Ертең елордада ерекше фестиваль басталады

Нұр-Сұлтан, BAQ.KZ. Қазақстан Республикасының Мәдениет және спорт министрлігі жəне Ақпарат және қоғамдық даму министрлігінің ұйымдастыруымен телевизия форматындағы «Сәлем, Елорда!» І республикалық өнер фестивалі басталады.

Жоба «Рухани жаңғыру» бағдарламасының аясында ұлттық құндылықтарымызды ұлықтап, биыл республика деңгейіндегі мерейтойлар мен атаулы даталарды қамтиды. Мəселен, өнер мерекесі Әбу-Насыр Әл-Фарабидің 1150, Алтын орданың 750, Абай Құнанбайұлының 175, Шәмші Қалдаяқовтың 90, Екінші дүниежүзілік соғыстың аяқталуына 75 жыл толуына жəне Қазақстан халқы ассамблеясының ширек ғасырлық мерекесіне арналады.

Фестиваль аясында еліміздің барлық облысындағы үздік шығармашылық ұжым мен орындаушы өнер көрсетіп, көрерменге жарқын эмоция мен ұмытылмас әсер сыйлайды. Сонымен қатар бұл фестиваль өңірлердегі өнер мен мәдени жетістіктерді кеңінен насихаттап, орындаушыларды кеңінен танытуда көздейді.

Айта кетейік, барлық концерт Мәдениет және спорт министрлігінің YouTube арнасынан көрсетілгеннен кейін Qazaqstan ұлттық арнасының өңірдегі филиалдарына жолданады. Фестиваль 20 қарашада, сағат 19.00-де басталады.

Ал ертең фестиваль шымылдығын Қызылорда облысының әртістері ашады.

Барлық қосымша ақпарат «Республикалық концерттік-гастрольдік қызмет орталығының» сайты мен Фейсбук , Инстаграм  әлеуметтік желісінде жарияланады.