"Енді сапаға мән берейік". Аймағамбетов қазақша анимацияны дамытуға шақырды
Мәжіліс депутаты Асхат Аймағамбетов қазақ тіліндегі мультфильмдерге 300 млн теңге бөлінгенін айтты, деп хабарлайды BAQ.KZ тілшісі.
Алайда мәселе қаржыландыруда емес, - мазмұн, сапа және қолжетімділік басты назарда болуы тиіс, дейді ол.
Мәжіліс депутаты Асхат Аймағамбетов енді басты мәселе - мультфильмдердің тәрбиелік миссиясы, сапасы мен шынайылығы екенін еске салады.
Мультфильм - баланың алғашқы ұстазы. Ол тілді, дүниетанымды, құндылықты сіңіреді. Біз мультфильмді жай ғана көңіл көтеру емес, ұлттық тәрбиенің іргетасы ретінде қарауымыз керек, - деді Аймағамбетов.
“Балапан” - көп баланың тілі шыққан арна
Аймағамбетов “Қазақстан” РТРК мен “Балапан” арнасының жұмысын оң бағалап, өз балалары да сол арнаның мультфильмдерін көріп тілі шыққанын айтты.
Енді осы тәжірибені кеңейтіп, YouTube алаңында да қазақ тілді өнімдердің саны мен сапасын арттыру қажет дейді.
Бүгінде бала теледидар емес, YouTube көреді. Бірақ қазақ тіліндегі қызықты контент тапшы. Сондықтан біз: Жас ерекшелігіне сай плейлисттер құрылуы, мазмұнның заманауи әрі баланың тіліне жақын болуы қажет екенін атап өттік, - деді ол.
Тіл - шынайы, қарапайым болуға тиіс
Кей мультфильмдердің тілін “канцеляризм мен жасандылық жайлаған” деп сынға алған депутат баланың құлағына түсінікті әрі өмірге жақын тіл қолданылуы шарт екенін айтты.
Бала өз тілімен байланыс орнатуы үшін кейіпкер тірі адамша сөйлеуі керек. Бұл – тәрбие мен танымның басты құралы, - деді ол.
Анимация ашық әрі әділ іріктелуі тиіс
Аймағамбетов жобаларды іріктеуде ашық конкурс, әділ бағалау мен сапаға ғана мән берілуі керектігін баса айтты. Сонымен қатар кадр дайындау мен 2D, 3D форматында оқытудың маңыздылығына тоқталды.
Қазақстанда анимация саласында дарын көп. Бірақ олар әділ мүмкіндікке зәру. Біз осыны шешуді ұсындық, - деді депутат.
Мультфильм нақты мақсатпен құрылуы керек
Әр анимациялық жоба нақты құндылыққа бағытталуы тиіс. Аймағамбетов “Қызықты ғылым”, “Киберқауіпсіздік”, “Мен кім боламын?”, “Эмоционалды интеллект” секілді нақты мазмұнға ие бағыттарды ұсынды.
Бұл бастамалар Президент тапсырмасымен толық үндеседі. Біз барлық ұсынысты ресми түрде Мәдениет және ақпарат министрлігіне жолдадық, - деді Асхат Аймағамбетов.