Енді кім көп табыс тапса, сол көбірек салық төлейді

Бұл туралы Парламент палаталарының бірлескен отырысында Мәжіліс төрағасы Ерлан Қошанов айтты, деп хабарлайды BAQ.KZ тілшісі.

Еске сала кетсек, елімізде жаңа Салық кодексі қабылданды. ҚҚС (қосылған құн салығы) негізгі мөлшерлемесі 12%-дан 16%-ға өсетін болды.

Енді кім көп табыс тапса, сол салықты көбірек төлейді. Бұл ретте, табысы төмен азаматтар үшін елеулі жеңілдіктер қарастырылған. Бірыңғай жинақтаушы зейнетақы қорынан төленетін төлемдер жеке табыс салығынан босатылады, - деді ол.

Қошанов атағандай, көтерілген тағы бір маңызды әлеуметтік мәселе – дәрі-дәрмек пен медициналық қызметтерді қосылған құн салығынан босату.

Сондай-ақ, депутаттар кітап оқу мәдениетін насихаттау үшін баспалар мен баспасөз басылымдарын қолдау жайын да қарастырды.

Жалпы, қабылданған Салық кодексі мемлекет – бизнес – қоғам арасындағы әділетті қарым-қатынастың жаңа кезеңіне жол ашпақ. Үкіметпен бірлескен жұмыстың нәтижесінде біз сапалы, ашық, әділетті әрі түсінікті Салық кодексін қабылдадық, - деп айтты Мәжіліс спикері отырыста.

Еске салайық, бұған дейін Ғани Бейсембаев мұғалімдердің айлығы тағы көтеріле ме деген сұраққа жауап берген болатын.