«Еңбек жолы» - 2022 байқауының өңірлік кезеңінің қорытындысы шығарылды

Еңбек әулеттері мен өндіріс жұмыскерлері арасында жыл сайын дәстүрлі түрде өтетін «Еңбек жолы» республикалық конкурсының өңірлік кезеңінің қорытындысы шықты, деп хабарлайды BAQ.KZ.

Еңбек және әлеуметтік қорғау министрлігінің мәлімдеуінше, биылғы жылы түрлі номинацияларға қатысу үшін Қазақстанның барлық өңірінен 522 өтінім берілген болатын.

Аймақтық комиссиялар номинанттарды үш санат бойынша таңдады:

- «Үздік еңбек әулеті», 163 өтінім;

- «Жұмыс істейтін жастардың үздік тәлімгері», 179 өтінім;

- «Өндірістің үздік жас маманы», 180 өтінім берілді.

Конкурстың өңірлік кезеңінің қорытындысы бойынша жоғарыда аталған номинациялардың әрқайсысында 17 облыстан және республикалық маңызы бар 3 қаладан жеңімпаздар анықталды.

Конкурс лауреаттарын жақын арада ҚР Еңбек және халықты әлеуметтік қорғау министрлігі жанындағы республикалық комиссия айқындайды, оның құрамына ведомство өкілдері, ҚР Парламентінің депутаттары, әлеуметтік әріптестер, «Атамекен» ҰКП және ҚР Ақпарат және қоғамдық даму министрлігінің «Қоғамдық келісім» РММ өкілдері кіреді.

«Еңбек жолы» - 2022 байқауының жеңімпаздарын марапаттау рәсімін өткізу биылғы жылғы қараша айының соңына жоспарланған.