Емханада келеңсіз жағдай орын алса, қалай шешу керек?

Емханаға барған кезде келеңсіз жағдайлар қаншалықты жиі орын алады? Олардың көпшілігін сол жерде шешуге болатынын білесіз бе? Егер емдеу орнында мәселе шешілмесе, не істеу керек? Бұл туралы Әлеуметтік медициналық сақтандыру қоры елордалық филиалының баспасөз қызметі айтып берді, деп хабарлайды BAQ.KZ.

1-жағдай

МӘМС жүйесіндегі мәртебеңіз «Сақтандырылған», бірақ емханада сізге сақтандырылмағансыз дейді. Мұндайда техникалық ақау орын алуы немесе сіздің мәртебеңіз туралы мәліметтер емхананың медициналық ақпараттық жүйесінде жаңартылмаған болуы мүмкін.

Мұндай жағдайда не істеу керек?

• Қордың ресми ресурстарының бірі – Telegram-дағы @Saqtandyrybot, Qoldau 24/7 мобильді қосымшасын ашыңыз немесе eGov.kz-тегі жеке кабинетке кіріңіз
• Өз ЖСН-іңізді теріңіз
• МӘМС жүйесіне соңғы 12 айда төленген жарналардың көшірмесін алыңыз

Егер барлық төлемдер болса, сіздің мәртебеңіз «сақтандырылған» болса, Пациенттерді қолдау қызметіне хабарласыңыз. Қолыңызда болған жағдайда, төлем түбіртектерін көрсетуге болады. Сондай-ақ, мәртебені тексеру үшін 1414 Бірыңғай байланыс орталығына жүгіне аласыз.

Егер соңғы 1 жыл ішінде төленбеген кезеңдер (айлар) болса, мәртебеңізді қалпына келтіру үшін өткізіп алған барлық айларға жарналарды төлеңіз. Жарналар бойынша берешек төленгеннен кейін мәртебе 3 жұмыс күні ішінде жаңартылады. Яғни дәрігердің қабылдауына бірден жазыла алмайсыз, қабылдауды басқа күнге ауыстыру қажет.

2-жағдай

Сіз сақтандырылғансыз және МӘМС жарналарын үзбей төлейсіз, бірақ сізге бейінді мамандардың қабылдауына және/немесе тексерулерге жолдамалар берілмейді.

Не істеу керек?

Сізде жолдама беруге медициналық көрсеткіш болмауы мүмкін. Дәрігер пациентті консультациялық-диагностикалық қызметтерге жіберу туралы шешімді диагноз белгілері негізінде және клиникалық хаттамаларды ескере отырып қабылдайды.

Егер сізде медициналық көрсеткіштер бола тұра жолдама берілмесе, емханадағы Пациенттерді қолдау қызметіне жүгініңіз. Егер жағдай шешілмесе, сіз 1414 нөміріне қоңырау шалып, шағым қалдыра аласыз.

3-жағдай

Сізге тексерілуге немесе бейінді маманның кеңесіне жолдама берілді, бірақ жақын арада ол жерге жазылу мүмкін емес. Нәтижесінде күте тұруыңызды сұрайды.

Не істеу керек?

Бұрын пациенттер өзінің тіркелген емханаларында ғана медициналық қызмет ала алатын немесе белгілі бір диагностикалық орталықта қымбат тексеруден өту үшін квотаны күтетін. Қазір емханада жоспарлы медициналық көмекті екі апта ішінде ұсына алмаса, пациентті қажетті консультациялық-диагностикалық көмек алу үшін бірлесіп орындау шарты бойынша жұмыс істейтін басқа медициналық ұйымға жолдамамен жіберуі тиіс.

Егер дәрігер жолдама беруден бас тартса, Пациенттерді қолдау қызметіне немесе бас дәрігердің емдеу ісі жөніндегі орынбасарына жүгіну керек. Мәселені сол жерде шешу мүмкін болмаса Медициналық сақтандыру қорының ресми кері байланыс арналары арқылы - fms.kz сайтының «сұраныс жіберу» бөлімі арқылы, Qoldau 24/7 мобильді қосымшасы арқылы немесе 1414 бірыңғай байланыс орталығына қоңырау шалу арқылы өтініш қалдыра аласыз.

4-жағдай

Сізге тегін медициналық көмектің кепілдік берілген көлеміне немесе МӘМС пакетіне кіретін медициналық қызметтер үшін ақы төлеңіз дейді. Мысалы, КТ/МРТ нәтижелері жазылған диск пен пленканы сатып алуды және алдағы айға жазыла алмауына байланысты ақылы негізде ультрадыбыстық тексеруден өтуді және т.б. сұрайды.

Не істеу керек?

Мұндай жағдайда бірден Пациенттерді қолдау қызметіне немесе бас дәрігердің емдеу бөлімі бойынша орынбасарына жүгініп, не себепті медициналық қызмет көрсетуден бас тартқанын сұрау қажет.

Егер мәселе шешілмесе, Сіз Қорға шағым түсіріп, ресми жауап күте аласыз. Әдетте бұл мәселенің күрделілігіне және жоспардан тыс мониторинг жүргізу қажеттілігіне байланысты 1-ден 5 жұмыс күніне дейін созылады.

Егер сіз төлем жасап қойсаңыз, ақылы қызметтерді алуға келіскендігіңізді білдіреді. Сондықтан сіз қаражатыңызды қайтара алмайсыз. Алда осындай келеңсіздіктерге жол бермеу үшін Қорға хабарласу керек, Қор өз тарапынан медициналық ұйымға тиісті түсіндіру жұмыстарын жүргізеді.

5-жағдай

Медициналық қызметтерге бөлінген қаражат лимиті таусылды, келесі айда келіңіз. Сіз осындай сипаттағы медициналық көмектен бас тарту жағдайына қаншалықты жиі ұшырайсыз?

Медициналық көмек алуға лимит қойылмайды. Егер тексеруден өтуге немесе бейінді маманның консультациясын алуға медициналық көрсеткіштер болса, сіздің учаскелік дәрігеріңіз өз емханаңыздың мамандарына жолдама беруі немесе бірлесіп орындау шарты бойынша басқа медициналық ұйымға жолдамамен жіберуі тиіс.

6-жағдай

Сіз емханаға қатты ауырып бардыңыз делік. Созылмалы аурудың өршуімен, жарақатпен немесе ЖРВИ белгілерімен жүгінсеңіз де, МӘМС жүйесінде мәртебеңіздің жоқ екенін айтып, сізге медициналық көмек көрсетуден бас тартады.

Мұндай жағдайда не істеу керек?

Алғашқы шұғыл медициналық көмек қажет болған кездепациенттің тіркелген медициналық ұйымның орналасқан жері де, МӘМС жүйесіндегі сақтандырылған мәртебесі де маңызды емес. Пациент жақын жердегі емхананың фильтр кабинетіне жүгіне алады немесе жедел медициналық көмек бригадасын үйге шақыра алады. Сондай-ақ, жақын жердегі ургентті клиниканың травматологиялық пунктіне немесе қабылдау бөлмесіне бара алады. Мұндай клиникалар туралы ақпаратты 103 нөміріне қоңырау шалып, сұрап алуға болады.

7-жағдай

Сіз әлеуметтік маңызы бар немесе созылмалы аурумен Д есепте тұрсыз, бірақ сақтандырылған мәртебеңіздің жоқтығына байланысты олар сізді қараудан және басқа салалық мамандардың кеңесіне жіберуден бас тартады.

Мұндай жағдайда не істеу керек?

Д-есепте тұрған созылмалы немесе әлеуметтік маңызы бар аурулары бар пациенттер мәртебесінің бар-жоғына қарамастан, ауру түрі және клиникалық хаттаманың ұсынымдарына сәйкес тегін дәрі-дәрмекпен қамтамасыз етуді қоса алғанда, барлық қажетті медициналық көмекті ала алады.

Басқа жағдайларда,сырқаттары бойынша жоспарлы медициналық көмек алу үшін сақтандырылған мәртебесінің болуы қажет.

Егер сіз Д-есепте тұрмасаңыз, тексерулерден өтіп, диагнозды бейінді мамандармен растау үшін мәртебе керек болады. Барлық жоспарлы консультациялық-диагностикалық көмек МӘМС есебінен көрсетіледі.

8-жағдай

Дәрігер сізге «Сақтандырылған» мәртебесі керек екенін және бұл үшін 2020 жылдан бастап МӘМС жарналарын төлеу қажет дейді.

Не істеу керек?

Сақтандырылған мәртебесін алу үшін алдағы 12 айға немесе тұрақты төлем жасамаған болсаңыз, соңғы бір жылдағы берешек айларға төлем жасап шығу керек.

Айта кету керек, егер МӘМС жарналарын бұрын-соңды төлемеген болсаңыз, өткен жылғы қарызды төлемеуіңізге болады. Оның орнына, ағымдағы айды қоса алғанда, алдағы 12 айға жарналарды төлеп, «сақтандырылған» мәртебесін алуға болады. Мәртебе 3 жұмыс күні ішінде беріледі, және алдағы төленген 12 ай ішінде мәртебеңіз сақталады.

9-жағдай

Сақтандырылған мәртебенің жоқтығына байланысты сізге скринингтер жасаудан бас тартады.

Не істеу керек?

Кейбір онкологиялық ауруларды ерте анықтау мақсатында скринингтен өту үшін сізде сақтандырылған мәртебесі болу керек.

Бірақ сақтандырылмаған пациенттерде өте алатын 30-70 жас аралығындағы скринингтік тексерулер бар. Олар – Маклаков бойынша көзішілік қысымды өлшеу немесе байланыссыз пневмотонометрия, жалпы холестерин мен глюкозаны анықтау, ЭКГ, сонымен қатар нәтижелерді түсіндіру үшін терапевтің қабылдауы.

10-жағдай

Сіз МӘМС жарналарын мемлекет төлейтін азаматтардың жеңілдігі бар санатына кіресіз, бірақ жүйеде сізге мәртебе берілмеген.

Не істеу керек?

Жеңілдік мәртебесі азаматтарды тиісті реестрлер мен базаларға енгізу негізінде беріледі. Мұның бәрі төлеушінің санатына байланысты. Мысалы, күндізгі бөлімде оқитын студенттер Ұлттық білім беру базасына, ал жүкті әйелдер жүкті және фертильді жастағы әйелдер тізіліміне қосылуы керек. Егер пациенттің деректері тиісті базаларда болмаса және Қор мемлекеттік органдардың ақпараттық жүйелерінен мәлімет алмаса, онда олар жеңілдік санатына кіре алмайды. Мұндай жағдайда студенттер өздерінің оқу орнының деканатына жүгінуі тиіс, ал әйелдер жүктілік бойынша есепке тұруы керек.

Егер сізде қосымша сұрақтар туындаса немесе егжей-тегжейлі кеңес қажет болса, 1414 бірыңғай байланыс орталығына қоңырау шалыңыз.