Елордалықтар домбыра күніне арналған концертке қатыса алады

Нұр-Сұлтан, BAQ.KZ. Елордада 7 шілде күні Ұлттық домбыра күніне арналған мерекелік концерт өтеді. Осыған орай «Қазақ Елі» монументінің алдындағы алаң үлкен сахнаға айналады. Шараға жас ерекшелігіне қарамастан ниет білдіргеннің бәрі қатыса алады, деп хабарлады елорда әкімдігінің баспасөз қызметі. 

Олар «Сарыарқа», «Адай», «Әлқисса», «Көңіл толқыны», «Балбырауын» және «Көреғұлы» күйлерін жатқа білуге тиіс. Шараға қатысу үшін 5 шілдеге дейін www.asyldombyra.kz сайтында онлайн тіркелу керек. 

«Биыл Ұлттық Домбыра күніне орайластырылған жаппай концертте орындалатын алты күй таңдалды. Әрине, қатысушылар бұл күйлердің бәрін білгені жақсы. Дегенмен, ұсынылған композициялардың біреуін ғана білетіндер де концертке үлес қоса алады», - деп хабарлады Нұр-Сұлтан қаласының Мәдениет және спорт басқармасынан. 

7 шілдеде мереке барысында күмбірлеген күйден басқа да жиналғандар назарына «Жастар» театрының актерлері тарихи қойылымын ұсынады, елордалық музыка мектептерінің шәкірттері өз өнерлерін ортаға салады, ақындар айтысы өтеді. 

Суырып салма өлеңге ысылған жандар ұлттық музыкалық аспабымыз – домбыраны жырға қосады. 

Сонымен қатар, «Қазақ Елі» монументінің алдындағы алаңда киіз үйлер тігіліп, қазақ ауылы орын тебеді. Келушілер домбыраның және басқа да ұлттық аспаптардың түр-түрімен таныса алады. Сонымен қатар, мерекелік кеш Есіл өзенінің жағасындағы Амфитеатрда «Нағыз қазақ – домбыра» атты концертімен жалғасын табады. 

Сахна төрінде Қазақ оркестрі, Нұр-Сұлтан қаласы әкімдігінің Мемлекеттік академиялық филармониясының солистері мен вокалистері өнер көрсетеді. Концерттің басталуы сағат 17.00-де. Кіру – тегін.