Елордада 12 мекеме карантин бұзушылар тізіміне енді

Нұр-Сұлтан, BAQ.KZ. Елордалық мониторингтік топтар тәулік бойы күшейтілген режимде жұмысын жалғастыруда. Көптеген ескертуге, жауапкершілікке тартылатынына қарамастан, қала мекемелерінде карантиндік шектеулер әлі де бұзылып, келушілер мен қызметкерлердің денсаулығына қауіп төндіруде.

Бұл туралы Нұр-Сұлтан әкімдігінің ресми сайтында хабарланды.

Өткен тәулікте, 11 қыркүйекте мониторингтік топтар елорданың 12 мекемесінде карантин талаптарының бұзылғанын анықтады.

Ең көп бұзушылар Есіл ауданында тіркелді - 6 нысан. Тексеріс кезінде Zima барлар галереясында 500-ге жуық адам болған. Cabera гриль-барында, «Панаехали» барында, Khan El-Khalili кафесінде, «Мята Platinum Nursaya» ресто-барында, Tequila барында жұмыс режимі сақталмаған.

Алматы ауданында «Киш Миш» кафесі, Tema компьютерлік клубы, «Панаехали» атмосфералық бары және «Что Будет Дальше» караоке-бары карантин бұзушылар тізіміне енді.

Сарыарқа ауданында орналасқан «Амарин» және «Шашлыкофф» мейрамханаларында да карантиндік шектеулер ескерілмеді.

Тәртіп бұзушыларға қатысты жиналған барлық материал әкімшілік сипаттағы шаралар қабылдау үшін санитарлық-эпидемиологиялық бақылау саласындағы уәкілетті органға берілді.

Айта кету керек, COVID-19 вирусын жұқтырғандар санының төмендеуіне қарамастан, елорда эпидемиологиялық жағдайды бағалау бойынша әлі де «қызыл» аймақта қалып отыр. Сондықтан қала тұрғындары мен қонақтары санитарлық нормаларды қатаң сақтауы керек: маска режимі, әлеуметтік қашықтық, қол гигиенасы. 

Азаматтар өздерінің және айналасындағылардың денсаулығын сақтау үшін коронавирусқа қарсы вакцинациядан өтуі керек, өйткені вакцинамен иммундау қауіпті вируспен күресудің жалғыз тиімді әдісі болып табылады.