Елордалық жастар тарихшылармен бірге киелі жерлерді аралады

Нұр-Сұлтан, BAQ.KZ. Жастар жылы және "Рухани жаңғыру" жобасы аясында Нұр-Сұлтан қаласы Қазақстан халқы Ассамблеясы, этномәдени бірлестік мүшелері, ЖОО тарихшылары мен елордалық ҚХА жастары Ақмола облысының тарихи-өлкетану орындарына экскурсия жасады. Бұл туралы Қоғамдық келісім КММ баспасөз қызметінен хабарлады. 

Елордалық Достық үйі алаңынан жолға шыққан топ Нұр-Сұлтан қаласы аумағынан, Бозоқты өзенінің шығыс жағалауына, Есіл өзенінен өтетін дәстүрлі өткел – Қараөткелден оңтүстік-шығысқа қарай 5 шақырым қашықтықта орналасқан Бозоқ қалашығына аттанды.

Айта кетсек, қазіргі кезде бұл археоло­гиялық нысан­ның аумағы Нұр-Сұлтан қала­сы­ның шеңберінде жатыр.

Экскурсияны К.Ақышев атындағы археологиялық ҒЗИ директоры, тарих ғылымдарының докторы, профессор Марал Хабдулина бастап шықты. Ол қатысушыларға Бозоқ қалашығын зерттеу туралы хронологиялық кестені түсіндіріп, академик К.Ақышевтің алғашқылардың бірі болып Бозоқ қалашығын музейге айналдыруға ұсыныс жасағанын атап өтті.

"Бозоқ жөнінде археологтар бірнеше маусым далалық қазба жұмыстарын жүргізді. Осы уақытқа дейін біршама кітап, зерттеу еңбектері де  жазылды. Музей ашу туралы осыған дейін біраз құзырлы орындарға жүгіндік. Міне, енді сәті түсіп, жұмыстар басталып жатыр. Археологтардың талпынысы жүзеге асып, үміті ақталуда. Болашақ ұрпақ үшін тарихымызды тереңдей танып-білу өте маңызды. Сіздер көріп тұрған бұл жерлер, бірнеше айдан соң ашық аспан астындағы ерекше музейге айналмақ", - деді Марал Қалымжанқызы.

Тарихи-мәдени мұраға айналған орта ғасырлық қала орындарына саяхат жасаған экскурсия қатысушылары тарихы тереңде жатқан Бозоқпен кеңірек танысты.

Жұмыс барысында Нұр-Сұлтан қаласы Қазақстан халқы Ассамблеясы, этномәдени бірлестіктер мүшелері және елордалық ҚХА жастары тазалық акциясына өз үлестерін қосты. Барлығы біріге ежелгі қалашық орынын қоқыстан тазартты. Содан кейін қатысушылар ұйымдастырушылар ұсынған таза ауадағы түскі астан дәм татты. 

Бұл жерден кейін Нұр-Сұлтан қаласынан 120 шақырымдай жерде орналасқан Құмай археологиялық-этнографиялық қорым ескерткішіне жолға шықты. Ақмола облысының Ерейментау ауданы Жыланды тау жотасының етегінде жатқан бұл қорым 2009 жылы табылған. Құмай өзенінің сол жағалауындағы алқапта радиусы 3-7 шақырым аумақта жатқандықтарына байланысты бұл қорымдарды ғылыми айналымға да осы атаумен енгізген екен. Елордалық ҚХА жастары профессор Марал Хабдулинаның ескерткіштер туралы толыққанды ғылыми-та­ным­дық мағлұматтарына сусындап, көкейдегі сұрақтарына жауап алды. Тарихи нысандарды аралап көріп, асыл мұрамызды одан әрі қадірлей түсуіне себепші болған ұйымдастырушыларға қатысушылар алғыстарын айтты.

Экскурсия "Ақмола облысының киелі нысандары" атты К.Ақышев атындағы археологиялық ҒЗИ аға ғылыми қызметкері Данияр Тілеуғабыловтың дәрісімен Қоянды ауылында аяқталды.

Айта кетейік, келесі сапар 12 қазан күні Қарағанды облысына жасалады.