Елордада TUMO креативті технологиялар орталығы ашылады

Бұл туралы Astana Hub басқарушы директоры Валерия Тё айтты, деп хабарлайды BAQ.KZ тілшісі.

Қазан айында ашылатын орталық 12-18 жас аралығындағы оқушыларға арналған. Бағдарлама 11 бағытты, яғни генеративті жасанды интеллек (ЖИ), ойын жасау, анимация, 3D моделдеу, робототехника және басқа да салаларды қамтиды.

TUMO – Астанада орналасқан халықаралық ЖИ орталығы Alem.ai ғимаратының 2 және 3-қабаттарында орналасады. Жылына 5000 оқушыны тегін оқыту жоспарланып отыр. Ешқандай іріктеу талаптары жоқ, жақын арада alem.ai сайтында өтінім қабылдау басталады.

Алдағы 3-5 жылда біз бұл жобаны Қазақстанның барлық аймақтарына, соның ішінде шалғай елді мекендерге дейін кеңейтіп, әрбір оқушыға осындай мүмкіндікті қолжетімді етуді көздеп отырмыз, - деді Валерия Тё.