Елімізде жыл сайын 4 мыңға жуық сәби ақаумен дүниеге келеді

Елордада нәресте өлімі мен балалар мүгедектігін азайту мәселесіне арналған ІІ халықаралық конгресс өтіп жатыр, деп хабарлайды BAQ.KZ тілшісі.

Денсаулық сақтау министрлігінің бастамасымен қолға алынған жиынды ұйымдастыруға ПІБ Медициналық орталығының ауруханасы мен "Пренаталдық медицина мамандары" қоғамдық бірлестігі мұрындық болып отыр.

Конгресс барысында пренаталдық медицина саласының мамандары нәресте өлімін және балалар арасындағы мүгедектікті азайту үшін ғылыми жетістіктерді, клиникалық тәжірибені ортаға салады. Сондай-ақ туа біткен даму кемістіктері мен хромосомалық патологияларды пренаталдық және постнаталдық диагностикалау саласындағы жетістіктерін талқылайды.

Бүгін конгресс адамзаттың ортақ мұрасына айналған маңызды тақырыпты көтеріп отыр. Себебі дені сау ұрпақ – еліміздің келешегі. Ел болашағы бүгінгі ұрпақтың денсаулығы мен тәрбиесіне тікелей байланысты. Сондықтан бұл мәселені ұдайы назарда ұстап, жан-жақты талқылап, нақты әрекеттерге көшкен дұрыс деп есептейміз. Халқымызда "Тұқымың көбейгір", "Тұқымың жайылғыр" деген ұлы сөздер бар. Соның барлығы бір ауыз сөзбен алғанда генетика деген үлкен ғылымға келіп тіреледі. Генетика – жан мен тәннің ілімі. Сол ілімді зерттеп, зерделеп жүрген дәрігер мамандардың еңбегі зор, - деді ашылу салтанатында сөз сөйлеген Сенат депутаты Нұртөре Жүсіп.

Айта кетерлігі, жалпы елімізде пренатологиялық диагностиканы жетілдіру мақсатында барлық әлемдік озық тәжірибелер енгізілуде.

Өздеріңіз білетіндей, соңғы 4 жылда біз ауқымды іс-шараларды атқардық. Әсіресе мамандардың біліктілігін арттыру, медициналық ұйымдарды жабдықтауда бірқатар іс қолға алынды. Жалпы жүктілік кезінде құрсақтағы ұрықтың денсаулығын бағалап, қажетті көмек көрсету арқылы біз қоғамға дені сау бала беруге үлкен мүмкіндік жасаймыз. Яғни біздің денсаулық сақтау жүйесінің негізгі бағытының бірі – бұл дүниеге келетін әрбір сәбидің дені сау болуын қамту. Дені сау сәби – ұлтымыздың болашағы, - деп атап өтті ҚР ДСМ Аналар денсаулығын сақтау басқармасының басшысы Шәкизат Халықова.

Сонымен қатар ведомство өкілі жылына қанша сәбидің денсаулығында кінәратпен дүниеге келетініне тоқталды.

Жыл сайын елімізде 370-380 мыңдай сәби дүниеге есігін ашады. Өкінішке қарай, олардың 1%-ы туа біткен ұрықтың дамуындағы ақаумен туылады. Балаларды ерте диагностикалау – мүгедектіктің алдын алудағы басты қадам. Медициналық, әлеуметтік мәнді емге көнбейтін, түзелмейтін патологиялар да құрайтынын түсінеміз. Денсаулығында кінәратпен туылған сәбилердің көбі шетінеп кетеді. Аман қалғандары мүгедек болып қалады. Оларға қосымша қымбат ем мен үнемі күтім, әлеуметтік қорғау қажет. Бұл елдің экономикалық көрсеткішіне әсер етеді, - деді Шәкизат Жақсынбетқызы.

Конгрессте генетикалық ауруларды ерте анықтау, заманауи скрининг әдістері мен "Бір күндік клиникалар" моделінің тиімділігі талқыланады деп күтілуде. Инвазиялық емес тесттер мен репродуктивтік технологияларға да назар аударылады.