Елімізде жұмыссыздар саны 450 мыңға жуықтады

Нұр-Сұлтан, BAQ.KZ. Қазақстанда 450 мыңға жуық адам екі қолға бір күрек таппай жүр.

 Бұл туралы "Мемлекеттік әлеуметтік сақтандыру қоры" АҚ бас директоры Нұрсұлу Кемел айтты.

Жұмыссыз қалған азамат портал немесе жұмыспен қамту орталығы арқылы жұмыссыз ретінде тіркелуі керек. Бізде көп азамат тіркелмей уақыт жоғалтып алады. Мемлекеттен берілетін жәрдемақы жұмыссыз ретінде ресми тіркелгеннен кейін ғана тағайындалады. Одан әрі төлем автоматты түрде рәсімделеді, - деді Нұрсұлу Кемел.

Қор басшысының айтуынша, жұмыссыз ретінде әлеуметтік төлем алатындардың өсімі байқалмайды.

Қазір 450 мыңға жуық жұмыссыз адам бар. Бұл - ресми статистика. Соның 106 мыңы біздің қорға келіп отыр. Сол жұмыссыз жүрген азаматтардың 20-30 мыңы мемлекет тарапынан берілетін әлеуметтік төлемнің барын әлі де білмейді. Біз кәсіпорындар мен жұмыс берушілерге қызметкеріңізді жұмыстан шығарып жатсаңыз, әлеуметтік төлемнің барын айтыңыз деп ескертіп жатамыз, - дейді ол.