Елімізде пәтер жалдау құны қымбаттауы мүмкін

Нұр-Сұлтан, BAQ.KZ. Елімізде жалға берілетін баспана құны тағы қымбаттайды. Сарапшылар алдағы тамызда жалдамалы пәтердің бағасы бірден 10-15 пайызға шарықтайды деген болжам жасады. Бағаның өсуі әсіресе ірі қалаларда байқалады дейді мамандар, деп хабарлайды КТК арнасы.

Жаздың соңғы айында жалдамалы пәтер бағасының өсуі жылда қайталанатын жағдай. Тамызда Нұр-Сұлтан, Алматы сынды алып шаһарға жан-жақтан ағылатын студенттер пәтер іздеп сабылады. Алайда жылжымайтын мүлік мамандары биыл жалға берілетін баспанаға деген сұраныс өткен жылмен салыстырғанда еселеп артатынын жеткізді. Сарапшылардың пікірінше, бағасы ай сайын аспандайтын тұрғын үйді сатып алуға көпшіліктің қалтасы көтермейді. Оған қоса мемлекеттің пәтер ақысын субсидиялауы жалдамалы үйдің құнына әсер еткен. Бұл үшін бюджеттен 40 млрд теңге бөлінген болатын. Ресейлік компаниялардың елімізге үдере көшуі мен туристердің көбеюі де тұрғын үй нарығындағы қымбатшылыққа себеп дейді Қазақстан риэлторлар қауымдастығының басшылығы.

Баға енді төмендемейді. Шетелдік компаниялар Алматы, Нұр-Сұлтан сында қалалардан кеңсе ашып жатыр. Туристер көбейді. Ресейден де келіп жатқандар көп. Демек, жалдамалы пәтерге сұраныс бар. Оған студенттер мен үйі жоқтарды қосыңыз. Сондықтан тағы 15 пайызға дейін бағаның көтерілуі болады. Бірақ қыркүйекте кішкене сұраныс азаяды. Сол уақытта баға қайтадан қалпына келуі мүмкін, – деді Қазақстан риэлторлар қауымдастығының президенті Александр Пак.