Елімізде медиа өкілдері өзара ынтымақпен жұмыс істеп, бір-бірін қолдап жүреді – министр

Бүгін – Халықаралық журналистер ынтымақтастығы күні, деп хабарлайды BAQ.KZ.

Бұл атаулы күннің шығу тарихы баршаға белгілі деп ойлаймын. Журналистика қай заманнан қауіпті мамандықтың бірі.  Журналистер әрдайым оқиғалардың ортасында, түрлі жағдайлардың алдыңғы шебінде жүреді.  Жұртшылыққа жедел жаңалық жеткізу үшін жарғақ құлағы жастыққа тимей жұмыс істейтін әріптестеріміз кейде өміріне қатер төнетін сәттер де кездеседі, - деп жазды Ақпарат және қоғамдық даму министрі Дархан Қыдырәлі. 

Ол медиа өкілдері өзара ынтымақпен жұмыс істейтінін айтты.

Жалпы біздің елімізде медиа өкілдері өзара ынтымақпен жұмыс істейді, бір-бірін қолдап жүреді. Бұл – жақсы үрдіс.  Тиісінше мемлекет журналистердің заңды кәсіби қызметін қорғайды әрі әріптестердің кедергісіз жұмыс істеуі үшін құқықтық кепіл болу жағын қарастырады. Мәселен, Қазақстанда журналиске қоғамдық маңызды мақсаттар үшін іс атқаратын адам ретінде, кәсіби қызметін жүзеге асыруына байланысты оның ар-намысын, қадір-қасиетін, өмірін, денсаулығын және мүлкін қорғауға кепілдік беріледі, - деді ол.

Министр бәсекеге қабілетті бұқаралық ақпарат құралдарын дамыту, журналистердің құқығын қорғау бағытында біраз жұмыс істеліп жатқанын айтты.

Министрлік бәсекеге қабілетті бұқаралық ақпарат құралдарын дамыту, журналистердің құқығын қорғау бағытында біраз жұмыс атқарып келеді. Айтпақшы, бүгін «Әділ сөз» және Геннадий Бендицкий қоры «Журналистер тәуелсіздік және қауіпсіздік үшін» атты дөңгелек үстел өткізіп жатыр. Біздің министрлік іс-шараны бірге ұйымдастырды. Мемлекет мүддесі жолында қызмет ете берейік, әріптестер!, - деді министр.