Елімізде интернет, ноутбук, дәрі-дәрмек және жерлеу рәсімі қымбаттады

Нұр-Сұлтан, BAQ.KZ. Биылғы сегіз айда азық-түлік бағасы – 7,3%, азық-түлік емес тауарларына – 3,4%, ақылы қызметтерге 2% қымбаттады, деп хабарлайды ҚР Ұлттық экономика министрлігі Статистика комитеті.

2020 жылғы қаңтар-тамыз айларында Қазақстанда инфляция 4,6% құрады.

Атап айтқанда, баға көтерілді: жармаларға – 21,5%, картопқа – 21%, жемістерге – 18,4%, қой етіне – 12,9%, құмшекерге – 12,3%, ұнға – 12,1%, макарон өнімдеріне – 10,7%, сары майға – 9,9%, мәйекті ірімшікке – 9,3%, жылқы етіне – 9,1%, сиыр етіне – 8,1%, шайға – 7,8%, мұздатылған балыққа – 7,3%, шұжық өнімдеріне, шошқа етіне – 6,6%-дан, тоқаш және ұннан дайындалған өнімдерге – 5,8%, пастерленген сүтке – 5,2%, нанға – 4,5%, сүзбеге 3,4%.

Темекі өнімдері – 10,8%, минералды және ауызсу – 8,9%, салқындатылған сусындар – 6,5%, алкогольді сусындар 6% қымбаттады.

Бұдан бөлек, баға дәрі-дәрмекке – 7,5%, жуғыш және тазалағыш құралдарға – 7,1%, тұрмыстық аспаптарға – 5%, құрылыс материалдарына – 4,9%, автомобильдерге – 4,7%, ноутбуктерге – 3,3%, кеңсе тауарларына 3,2% жоғарылады. Бензин 2,6% қымбаттады.

Сондай-ақ, баға жерлеу қызметтеріне 5,7% артқан. Денсаулық сақтау қызметтеріне – 4,3%, шаштараздар мен сұлулық салондар қызметтеріне – 3,8%, қоғамдық тамақтандыру қызметтеріне 2,5% өсті.

Интернет желісіне қосылу үшін абоненттік төлем 2,2% жоғарылады. Қалалық көлікпен (такси) жол жүру ақысы – 6%, пойыз билеттері 4,4% қымбаттады.

Қоқыс шығару бағасы – 11,1%, электр энергиясына 3,5% артты.

Бағаның төмендеуі жұмыртқаға – 6,1%, жаңа жиналған көкөністерге – 4,6%, сөкке – 2,4%, күрішке 2% тіркелді. Авиабилеттер – 6,2%, дизель отыны 3,2%, ыстық суға тарифтер – 5,5%, орталықтан жылытуға – 3,4%, кәрізге – 3,1%, суық суға 2,2% арзандады.