Елімізде халықтың 50 пайызы қиыншылықта – Әуесбаев

Жалпыұлттық социал-демократиялық партия атынан президенттікке кандидат Нұрлан Әуесбаев Астанада сайлаушылармен кездесті, деп хабарлайды BAQ.KZ тілшісі. 

Еуропада дамыған елдер Дания, Финляндия, Нидерланды, Франция, Англияны алсаң да социал-демократиялық идеяларды жүзеге асырып, дамыған. Соңғы 100 жылдықта толық тәжірибеден өткен, дәлелденген, іспен көрінген. Біздікі сияқты жабайы капитализм емес, - деді кандидат кездесу барысында.

Сондай-ақ Әуесбаев қазіргі қазақстандықтардың жағдайы туралы да ойын айтты.  

Елімізде 50 пайыз адамдар қиыншылықта. Олар өмірден безіп кеткен. Сенің мынау саяси әңгімеңді тыңдамайды, өмірден түңілген. 40 пайыз орта кезеңде, ортаға да жатпайды, бірақ соның аймағында. Ал жағдайы дұрыс, дамыған мемлекеттерде мына біздегідей 10 пайыз шексіз байлыққа иеленіп отырған адамдар емес. Байлар бар, одан кейін орта деңгейдегі адамдар көп, - деді ол.

Нұрлан Әуесбаевтың ойынша, орта деңгейдегі адамдардың үлесін көбейту үшін саяси жүйені түбегейлі реформалап, халықтың әлеуметтік жағдайын көтеру керек. Сонымен қатар, кандидат оппозиция туралы заң керегін атады.     

Елде оппозиция туралы заң қабылдану керек. Оның ішінде оппозициялық партиялардың да мүддесі қаралуы керек. Оларға халықтың айтқан әңгімесін жоғары мінберден айтатын мүмкіншіліктер берілуі керек. Ондай елде келеңсіз жағдайлар болмайды. Кейбіреулер Парламентте оппозиция бар ғой деп айтып жүреді. Ол жоқ, болған да емес, - деді ол.