Еліміз Франциямен стратегиялық серіктестікті жаңа сапаға көтереді

Өнеркәсіп және құрылыс министрі Қанат Шарлапаев SUEZ компаниясының өкілдерімен кездесу өткізді, деп хабарлайды BAQ.KZ ведомствоға сілтеме жасап.

Белгілі болғандай, кездесу барысында тараптар республиканың барлық аумағында сумен жабдықтау және су бұру жүйелерін жаңғырту жобаларын жүзеге асыруда бірлесіп жұмыс істеу мүмкіндіктерін талқылады.

Француз тарапы республикадағы сумен жабдықтау және су бұру жүйелерін жаңғыртуға қызығушылық танытып, саланы жаңғырту және оның қызметіне жаңа технологияларды тарту бойынша ұйымдастыру мәселелерін қарастырды. SUEZ компаниясының мамандары өз қызметінің тұсаукесерін өткізіп, суды тазартудың жаңа технологияларын тарту және одан әрі ынтымақтастық мәселелерін талқыға салды, - деп атап өтті министрліктен.

SUEZ – су мен қалдықтарды басқаруда жаһандық көшбасшылықты қамтамасыз ететін тұрақты дамуға ұмтылатын француздық коммуналдық компания. Компания тұтынушыларына сенімді және инновациялық шешімдерді қолдана отырып, сумен жабдықтау және канализацияға қол жеткізуге көмектеседі.

Кездесу қорытындысы бойынша SUEZ компаниясы жобаларға қатысуға қызығушылық танытты. Сондай-ақ жобаның құрылымы, инвестиция қайтару көздері және инвестордың операциялық шығындары туралы алдын ала ақпарат алмасты.