Еліміз Бірлік күнін міндетті түрде атап өтуге тиіс - Президент

Мемлекет басшысы Қасым-Жомарт Тоқаевтың қатысуымен ҚХА-ның XXXII сессиясында Қазақстан халқының бірлігі күні аса маңызды мереке екенін айтты, деп хабарлайды BAQ.KZ тілшісі.

ҚХА-ның кезекті сессиясы жыл сайын ел бірлігі күніне орай өткізу дәстүрге айналды. Осы орайда Президент бүгінгі өтіп жатқан жиынды ең ауқымды шара екенін жеткізді.

Еліміз жақында Қазақстан халқының бірлігі күнін атап өтеді. Бұл – ырыс-ынтымақты, татулық пен келісімді дәріптейтін мейрам. Қазақстан үшін бұл аса маңызды мереке. Еліміз Бірлік күнін міндетті түрде атап өтуге тиіс. Себебі қасиетті Отанымыздың іргесі бүтін, тұғыры мығым болсын десек, бірлігіміз әрқашан бекем болуы керек. Бұл – анық ақиқат. Ассамблеяның алқалы жиынын жыл сайын ел бірлігі күніне орай өткізу дәстүрге айналды. Бұл сессия – көктем мезгілінде мемлекеттік деңгейде өтетін ең ауқымды іс-шара. Мұнда еліміз үшін өте маңызды ұсыныстар айтылады. Мен былтырғы сессияда Ата заңымызға өзгерістерді референдум арқылы енгізу туралы бастама көтердім. Көп ұзамай халқымыз өзінің тарихи таңдауын жасады. Конституцияға енгізілетін өзгерістерді қолдап дауыс берді, - деді Президент.