Елде тұрғын үй секторында өрт қауіпсіздігі айлығы басталды

Жыл сайын суық ауа райының басталуымен және жылыту кезеңінің жақындауымен елімізде жеке тұрғын үй секторын аралау бойынша профилактикалық іс-шаралар жүргізіледі, деп хабарлайды BAQ.KZ.

Бұл туралы Төтенше жағдайлар министрлігіне қарасты Өртке қарсы қызмет комитеті мәлімдеді.

Белгілі болғандай, 15 тамызда еліміздің барлық өңірлерінде өрт қауіпсіздігі айлығы басталды.

Айлықтың мақсаты өрт санын азайтуға және олардағы адамдардың қаза болуына бағытталған іс-шаралар кешенін іске асыру болып саналады. Жыл сайын өрттің туындау және адамдардың қаза болу фактілерін болдырмау мақсатында халықтың әлеуметтік осал топтарының тұрғын үйлерінің профилактикалық жұмысы кезінде азаматтық қорғау органдары ерекше назар аударады. Сонымен қатар, азаматтық қорғау қызметкерлері жылыту пештерін нормаларға сәйкес келтіру және бітелген түтін мұржасын тазарту бойынша мүмкіндігінше көмек көрсетеді, - делінген ведомство хабарламасында.

Өрт қауіпсіздігі айлығының бірінші кезеңі (15 тамыздан 15 қыркүйекке дейін) бірінші кезекте халықтың әлеуметтік осал топтарын өрт қауіпсіздігі бойынша профилактикалық жұмыспен толық қамтуға бағытталған. Былтыр елімізде халықтың әлеуметтік осал топтарының 133 мыңнан астам тұрғын үйі есепке алынды.

Айта кету керек, азаматтардың осы санаты үшін автономды улы газ датчиктерін орнату тәжірибесі оң нәтиже көрсетті. Мәселен өткен жылыту кезеңінде көпбалалы, аз қамтылған отбасылар, зейнеткерлер тұратын үйлерде улы газды анықтайтын 43 мыңнан астам датчик орнатылды. Датчиктердің іске қосылуы нәтижесінде 26 адам құтқарылды.

ТЖМ азаматтарды қауіпсіздік ережелерін, сондай-ақ отты пайдалану кезінде сақтық шараларын сақтауға шақырады.