Елде мұнай мен газ өндіру қарқыны артты

Қазақстанда мұнай мен газ өндіру қарқыны артып келеді, деп хабарлайды BAQ.KZ тілшісі. 

Бұл туралы Үкімет отырысында Энергетика министрі Ерлан Ақкенженов мәлімдеді. 

Ведомство басшысы биылғы қаңтар-маусым айларындағы отын-энергетикалық кешенінің жағдайы туралы есеп берді. 

Есепті кезеңде мұнай өндіру көлемі 49,9 млн тоннаны немесе былтырғы жылдың сәйкес кезеңімен салыстырғанда 111,6%-ды құрады. Биыл жыл қорытындысы бойынша мұнайды өндіру 96,2 млн тонна деңгейінде күтілуде, - деп атап өтті министр.

Сондай-ақ ведомство басшысы мұнай экспортына ерекше тоқталды.

Есепті кезеңде мұнай экспорты 39,6 млн тоннаны немесе өткен жылдың сәйкес кезеңімен салыстырғанда 111,9%-ды құрады. Ағымдағы жылғы қорытындысы бойынша мұнай экспорты 70,5 млн тонна деңгейінде күтілуде. Газ саласы туралы тоқталсақ, есепті кезеңде 34,6 млрд м3 газ өндірілді немесе өткен жылдың сәйкес кезеңімен салыстырғанда 102,6%-ды құрады, - деді Ерлан Ақкенженов.

Айта кетерлігі, есепті кезеңде ел аумағында газ транзитінің көлемі 35,7 млрд м3 құраған. Сондай-ақ қаңтар-маусым айларының қорытындысы бойынша шамамен 7,6 млн тонна мұнай өнімдері өндірілді.

Мұнай-газ химиясы өнімдерін өндіру көлемі 382 мың тоннаны, немесе өткен жылдың сәйкес кезеңімен салыстырғанда 112,5% құрады. 62,2 млрд кВтсағат электр энергиясы өндірілді.   

6 айда жаңартылатын энергия көздері объектілерінен электр энергиясын өндіру 4,2 млрд кВтсағатты, немесе өткен жылдың сәйкес кезеңімен салыстырғанда 107,2%-ды құрады, - деді ведомство басшысы.

Еске салайық, бүгінгі Үкімет отырысындағы жиында 2025 жылғы қаңтар–маусым айларындағы әлеуметтік-экономикалық даму көрсеткіштері мен республикалық бюджеттің атқарылу нәтижелері талқыланады.

Отырыс қорытындысы бойынша Үкімет басшылығының қатысуымен баспасөз конференциясы ұйымдастырылады. Үкімет отырысы мен баспасөз мәслихатының тікелей көрсетілімі BAQ.KZ сайтында жүргізіледі.