Екібастұздың жылу желілері сынақтан өткізіледі
Екібастұз жылумен жабдықтау жүйелерін күрделі жөндеуге дайындалып жатыр, деп хабарлайды BAQ.KZ.
Жылу беру маусымы аяқталғаннан кейін бірден жөндеу жұмыстарына кіріседі.
Өңір басшысы "Екібастұзжылуэнергиясы" ЖШС-нің өкілдерімен кездесті. Асайын Байханов Екібастұз қаласының әкімдігі мен "Екібастұзжылуэнергиясы" ЖШС-ің басшылығына жөндеу жұмыстарының нақты жоспарын әзірлеп, қала тұрғындарына жұмыстардың барысы мен оларды жүргізу мерзімдері туралы хабардар етуді талап етті.
Павлодар облысы әкімдігінің баспасөз қызметінің хабарлауынша, қалалық ЖЭО-дағы апатқа байланысты ТЖ салдарымен күресіп жатқан Екібастұзда магистральдық және орамішілік жылу желілерінің гидравликалық сынақтары өтеді. Осыдан кейін коммуналдық қызметтер барлық анықталған ақауларды жөндеуге кіріседі.
Облыс әкімі Асайын Байханов кеншілер қаласында жөндеу науқаны кезінде ыстық судың болмау мерзімін дәл анықтауды тапсырды. Бұл кезең әрбір жеке шағын аудан үшін 2 айдан аспауға тиіс, - делінген Павлодар облысы әкімдігінің баспасөз хабарламасында.