Екі медпойыз еліміздің 40 мыңнан астам тұрғынына көмек көрсетті
Нұр-Сұлтан, BAQ.KZ. "Денсаулық" медициналық пойызы Маңғыстау облысының 10 шалғай станцисы бойынша сапарын аяқтады.
Медпойыз мамандары жергілікті тұрғындарға тегін медициналық көмек көрсетіп, бірқатар ауыр ауруды анықтап, одан әрі емделу мен тексерістен өту үшін жолдамалар берді.
Ересектер мен балалар арасында анықталған аурулардың көбі сан жағынан да, ауру дәрежесінің күрделілік деңгейі бойынша да аймақтан аймаққа өсіп жатыр.
Бұл жолы медициналық пойыз мамандары бірқатар ауыр онкологиялық және жүрек-қантамыр ауруларының анықталуының куәсі болды. Маңғыстау облысындағы медициналық тексерулердің статистикасы келесідей: жалпы 10 823 дәрігерге келу тіркелген, дәрігерлер 2 306 пациентті қабылдаған, оның ішінде 481 бала. Медициналық пойыз шағын хирургиялық оталар жасауға және скринингке қажетті барлық техникамен жабдықталған. Осылайша, пойызда 181 ФГДС процедурасы, 717 УДЗ (УЗИ) және 233 флюорография жасалды. Маңғыстау облысында тұрғындар ең көп барған дәрігерлер қатарында: стоматолог – ол 832 адамды қабылдады және 820 адамды тексеріп үлгерген офтальмолог.
"Маңғыстау облысының тұрғындарын тексеру барысында оннан астам онкологиялық аурулар анықталды, олардың ішінде: 2 бет терісінің ауруы, 1 ауыз қуысының ауруы, УДЗ нәтижесінде бауырдың метастатикалық зақымдануының 2 жағдайы, 2 бүйрек ауруы, 2 қуық ауруы, 1 қалқанша безі ауруы және бүйректегі қатерсіз ісіктің 3 жағдайы анықталды. Сондай-ақ, науқастардың біреуінде ЭКГ-ны тексеру кезінде бірінші рет екінші дәрежелі синомолекулярлы блокада анықталды - ол бірден Холтер мониторингіне жіберілді. Науқас одан әрі кардиостимуляторды имплантациялау үшін толық тексеруден өтуі керек. Біз барлық пациентке қорытынды мен одан әрі емделу үшін жолдамалар береміз", - деді Маңғыстау облысы бойынша медициналық бригада басшысы Зулия Камиева.
Медициналық пойыз мамандардың кең спектрімен жұмыс істейтін клиникалары жоқ елдің шалғай аудандарында тегін медициналық көмек көрсетеді. Мұндай көмек ауыр аурулардың таралуына жол бермейді. Науқастар дәрігерлер мен медбикелерге кәсіби деңгейде көрсеткен қызметтері үшін алғыс білдіреді.
"Бүгін біздің елді мекенге "Денсаулық" медициналық пойызы келді. Маған дәрігерлердің пациенттерге деген қарым-қатынастары ұнады: барлығы сыпайы, ұқыпты және өз ісінің шеберлері. Әсіресе, барлық науқастардың ішінде қарттар өте риза. Медициналық пойыздың бізге жыл сайын келіп тұрғанын қалаймыз", - дейді Сай-Үтес бекетінің тұрғыны Бейбітова Бағилаш.
Естеріңізге сала кетсек, жоба 29 сәуірден бастап жүзеге асырылып келеді және оның басты мақсаты еліміздің шалғай аудан тұрғындарын тегін медициналық қызметпен қамту. Жобаны "Самұрық-Қазына" АҚ компаниялар тобының атынан Samruk-Kazyna Trust Әлеуметтік жобаларды дамыту қоры ҚР Денсаулық сақтау министрлігінің ат салысуымен жүзеге асырып жатыр.
2019 жылдың 20 тамызында "Денсаулық" медициналық пойызына қосымша "Жәрдем" мамандандырылған медициналық пойызы іске қосылған болатын. Ол «Денсаулық» пойызы сияқты медициналық көмекке қолы жетпейтін шалғайдағы станциялар мен жақын орналасқан ауылдардың тұрғындарына алғашқы медициналық-санитарлық және консультативтік-диагностикалық көмек көрсетеді. Өз кезегінде "Жәрдем" медициналық пойызы қазір Ақтөбе облысын аралауда. Екі пойыздың іске қосылу уақытынан бастап барлығы 40 479 адам тексерістен өткен.
Пойыз вагондары неміс және жапон өндірісінің алдыңғы қатарлы фирмаларының заманауи диагностикалық құрал-жабдықтарымен жабдықталған. Аппаратуралар пациенттерге қажет болған жағдайда толық жалпы және биохимиялық талдаулар жасауға, ренгенография және флюорографиядан өтуге, ішкі органдарға және қан тамырларына УДЗ-зерттеулер жүргізуге, электрокардиограмма, гастрофиброскопия жасауға және басқа да диагностикалық зерттеулер жүргізуге мүмкіндік береді.
Пойыз кестесімен www.medpoezd.kz және www.sk-trust.kz/ru ресми сайттарында таныса аласыздар.