Оқушыны басқа мектепке ауыстыру үшін пара алған директорға айыппұл салынды

Нұр-Сұлтан, BAQ.KZ. Алматы қаласында мектеп директоры оқушыны еш кедергісіз басқа мектепке ауыстырып беру үшін 50 мың теңге пара алған.

Алматы қаласының Сыбайлас жемқорлыққа қарсы қызметі "№98 жалпы білім беретін мектеп гимназиясы" КММ бұрынғы директоры Д. А. Найзабековаға қатысты сотқа дейінгі тергеуді аяқтады.

Ол оқушыны "№181 жалпы білім беретін мектеп гимназия" КММ-нен №98 мектепке еш кедергісіз ауыстырғаны үшін 50 мың теңге көлемінде пара алды деген күдікке ілінген.

"27 қыркүйекте Алматы қаласы Медеу аудандық №2 аудандық соты пара алған Д. А. Найзабековаға қатысты үкім шығарып, директорға 1 млн 250 мың теңге көлемінде айыппұл салынды. Сондай-ақ мемлекеттік қызметте лауазымды қызметпен айналысуға өмір бойына тыйым салу жазасы белгіленді", - делінген хабарламада.