Димаш Құдайберген DIAFA жүлдесін Бибігүл Төлегеноваға арнады

Әлемге әйгілі қазақтың әншісі Димаш Құдайберген Дубайдан сәлем жолдап, күні кеше алған марапатын рухани ұстазы – биыл 95 жасқа толып отырған бұлбұл әнші Бибігүл Төлегенованың құрметіне арнады, деп хабарлайды BAQ.KZ тілшісі.

Бұл туралы ол өзінің әлеуметтік желідегі парақшасында жазды. 

Құрметті Бибігүл Ахметқызы! Күні кеше алған кезекті марапатымды алдағы келе жатқан 95 жылдық мерейтойыңыздың қарсаңында, сіздің құрметіңізге арнауға рұқсат етіңіз. Жастайымнан сіздің жоғары дәрежедегі өнеріңізге сусындап өсіп, сіздің аналық, ұстаздық өсиеттеріңіз бен батаңыздың арқасында қазіргі күні азды-көпті жетістіктерге қол жеткізіп келемін. Құрметті #dears, құрметті жерлестер! Шын жүректен барлық құттықтауларыңызға көп рахмет айтқым келеді. Еліміз аман, жұртымыз тыныш болсын! – деді әнші.

Еске салсақ, Димаш Құдайберген Дубайда DIAFA жүлдесінің иегері атанғанын хабарлаған болатынбыз.