Дайрабаев: Агробизнес құрғысы келетіндерге пайызсыз несие беретін арнайы агробанк қажет

Бүгін Қазақстан Республикасының Президенттігіне кандидат Жигули Дайрабаев сайлауалды үгіт аясында Түркістан облысының ауыл шаруашылығы өндірушілерімен кездесті,  деп хабарлайды BAQ.KZ.

Кездесуге ірі шаруа қожалықтарының басшылары, қарапайым фермерлер, мақта өсірушілер мен диқандар қатысты. 

Кандидат Жигули Дайрабаев кездесу барысында ауыл шаруашылығы өндірушілері үшін қаржыландырудың, жер және техникалық ресурстардың қолжетімділігі мәселелерін қозғады. Түркістан облысы фермерлердің көп шоғырлануымен және АӨК құрылымындағы үй шаруашылықтары үлесімен ерекшеленетіндіктен, бұл – өңір үшін ерекше өткір проблема.

Шағын шаруалар кооперациясы мәселелерінің шешілу деңгейі төмен, жер үлескерлері мен шартты жер үлестеріне иелік етушілер арасында дау мезгіл-мезгіл туындап тұрады. Мен сайлауалды бағдарламамда осы мәселелерді шешудің жеке бағытын белгіледім. Мен агробизнес құрғысы және аграрлық саланы нығайтқысы келетіндер үшін пайызсыз несие беретін арнайы агробанк құруды ұсынамын, - деді Жигули Дайрабаев. 

Кездесуде фермерлер су тапшылығы жайлы алаңдаушылықтарымен бөлісті. Олардың айтуынша, бұл мәселе жыл сайын артып келеді. 

Су ресурстарының тапшылығы экономиканың көптеген саласына, соның ішінде ауыл шаруашылығына теріс әсер етеді. Сондықтан су ресурстарының әлеуетін қалпына келтіру, оның ішінде су үнемдеу технологияларын дамыту жөніндегі жұмысты күшейту қажет, - деді Жигули Дайрабаев. 

Облыстың мақта өсірушілері де өз проблемаларын айтты.  Биыл Түркістан облысында 125 мың гектардан астам жерге мақта егілді, аграршылар 300 мың тонна өнім жинауды жоспарлап отыр. Кандидат мақташыларға мәселені шешу үшін мақта сатумен ғана емес, сонымен қатар қайта өңдеумен де айналысуды ұсынды, бұл олардың жағдайын едәуір жақсартып, аймақта жаңа жұмыс орындарын ашатынын айтты. Ол мемлекет есебінен шаруалармен бірлескен меншік негізінде қайта өңдеу зауытын салу ниеті бар екенін мәлімдеді.

Кездесу соңында жиналғандар Жигули Дайрабаевтың президенттік сайлаудағы бастамаларын қолдауға дайын екендіктерін айтты.