COVID-19: Алматыда ПТР тест өткізу орындары жұмысын қайта бастады

Алматы, BAQ.KZ. Алматыда бүгіннен бастап коронавирус бойынша ПТР тест өткізу орындары жұмысын қайта бастады. Бұл туралы Medical Partners Korea мәлімдеді.

Дүйсенбі күні, яғни 2020 жылдың 29 маусымынан бастап "Нұрлы-Тау" алдындағы мобильді тест өткізу орны мен "Халық Арена" алдында жаңа мобильді орын жұмысын бастайды. Жұмыс кестесі күн сайын сағат 09:00 ден 16:00 дейін, - делінген медициналық мекеменің сайтында.

Сондай-ақ, азаматтарды тіркеу сол орындарда жүргізіледі, компания онлайн тіркеуді жақын күндері іске қосуды көздеп отыр. Төлем карточка арқылы жасалады.
Сонымен қатар, хабарламада 18 маусымда талдама нәтижесін алмаған азаматтар шілденің 5-не дейін тесттен өте алатыны айтылған.

Бұған дейін Medical Partners Korea компаниясы тестілеуге қажетті құралдардың жетіспеушілігінен және шетелден уақытында жеткізілмей жатқанын мәлімдеп, тест жасау жұмыстарын тоқтата тұратындарын хабарлаған.