«Бурабай-Даму» мамандары аққу мен бірқазанды табиғат аясына жіберді

Былтыр күзде жылы жаққа бет алған кезде үйірінен қалып қойған сұңқылдақ аққу мен бірқазанды жергілікті тұрғындар тауып алып, Бурабай кентіндегі зоологиялық баққа әкелген болатын, деп хабарлайды BAQ.KZ.

«Бурабай-Дамудың» ветеринарлары емдеп, қыс бойы баптаған құстар бүгін табиғат аясына жіберілді.

Мамандар алты ай қыста әл жинап, өз бетінше өмір сүруге жарап қалған құстарды Бурабай ауданындағы Жайнақ көліне жіберді. Енді екеуі өз үйірін табуға тиіс.

Сұңқылдақ аққу мен бірқазан – еліміздің Қызыл кітабына енген құстар. Күзде бізге әкелген кезде ветеринариялық тексеруден өткізіп, қабылдап алдық. Әлсіреп, қатты қорқып қалғаны болмаса, зақымданған жері жоқ екен. Алты ай ішінде зоологиялық баққа үйреніп қалып еді. Бірақ бәрібір жабайы табиғат аясында, өздерінің ортасында өмір сүргені дұрыс, – дейді бақтың ветеринары Ильдар Файзулин.

Жалпы «Бурабай» мемлекеттік ұлттық паркінде құстың 197 түрі бар. Оның 14-і Қызыл кітапқа енгенін айта кетейік.