Бүгін Алматыда 80 жаңа жылдық шыршаның шамы жағылады
Мегаполистегі бас шыршаның шамын жағу рәсімі Абай атындағы алаңда өтеді, деп хабарлайды Алматыдағы BAQ.KZ тілшісі.
Биіктігі 25 метр болатын шыршаны безендіру үшін 6 шақырым гирлянда, сәндік элементтер, шырша шарлары, ірі банттар және қайта өңделген экологиялық қауіпсіз материалдардан жасалған жаңа жылдық ойыншықтар пайдаланылған.
Қаладағы барлық 80 шыршаның шамдары 19:00-де жағылады.
Шырша шамдарын жағу рәсіміне дейін, сағат 18:00-де Абай алаңындағы Республика Сарайының алдында "Алматының 8 кереметі: отбасылық мереке – таңғажайып Жаңа жылы" атты ауқымды шоу басталады. Іс-шарада Роза Рымбаева, Тұрар, Балжан Бидаш, "Альфа" тобы, Динара, Назым Әділдина, Мәди Рымбаев, Dakelot, "Астра" тобы, Adill және Malika Yes және басқа да эстрада жұлдыздары өнер көрсетеді, - деді Алматы қаласы әкімдігінің баспасөз қызметі.
Абай алаңына келген қала тұрғындары мен қонақтарын Күлбике күймесі, Зімбір адам және басқа да ертегі кейіпкерлері қарсы алады.
Фотозоналар, жарқыраған субұрқақтар және басқа да инсталляциялар халыққа ерекше мерекелік атмосфера сыйлайды. Іс-шараға келген қонақтар естелік фотосурет жасап, жаңа жылдық бейне түсіре алады. Сонымен қатар, Абай алаңында 2024 жылдың 20 желтоқсанынан 2025 жылғы 5 қаңтарға дейін мерекелік жәрмеңке өтеді. Мұнда қолөнер бұйымдары, кәдесыйлар және жаңа жылдық ойыншықтар ұсынылады, - деді Алматы қаласы әкімдігінің баспасөз қызметі.
Сағат 18:00-ден бастап мерекелік іс-шаралар қаланың 8 ауданында да өтеді:
Алатау ауданында – "Алатау" дәстүрлі өнер театрының аумағында (Нұркент шағын ауданы, 6).
Алмалы ауданында – Ғабит Мүсірепов атындағы Қазақ мемлекеттік академиялық балалар мен жасөспірімдер театрының аумағында (Абылай хан даңғылы, 38).
Әуезов ауданында – Н.Сац атындағы мемлекеттік академиялық орыс балалар мен жасөспірімдер театрының аумағында (Шаляпин көшесі, 22).
Бостандық ауданында – “Атакент” көрме орталығының алаңында (Тимирязев пен Әуезов көшелерінің қиылысы).
Медеу ауданында – Dostyk Plaza сауда ойын-сауық орталығының аумағында және Достық даңғылы, 85а/1 мекенжайында.
Наурызбай ауданында – Амфитеатр алаңында (Шұғыла шағын ауданы, 347).
Түрксіб ауданында – №6 Оқушылар үйінің аумағында (Сейфуллин даңғылы, 13/1).
Жетісу ауданында – Айнабұлақ шағын ауданындағы Арбатта (Мақатаев пен Жұмабаев көшелерінің қиылысы).