Брекешев пен Дюшекеев су шаруашылығындағы ынтымақтастық мәселесін талқылады

Нұр-Сұлтан, BAQ.KZ. Бүгін Экология, геология және табиғи ресурстар министрі С. Брекешев Қырғыз Республикасының Қазақстандағы Төтенше және Өкілетті елшісі Дастан Дюшекеевпен кездесті.

Бұл туралы ҚР Экология, геология және табиғи ресурстар министрлігінің баспасөз қызметі хабарлады.

Кездесуде тараптар су шаруашылығы саласындағы ынтымақтастық мәселесін талқылады. Серікқали Брекешев бұл бағытта екі ел арасындағы түсіністік арқасында оң нәтижеге қол жеткізу мүмкін болғанын атап өтті.

Биыл Шу және Талас өзендерінің бассейндеріндегі судың аздығына қарамастан, қырғыз әріптестерімізбен бірлескен іс-қимылдардың арқасында вегетациялық кезеңді үлкен шығынсыз аяқтай алдық, - деді министр.

Сондай-ақ тараптар жануарлар әлемі, орман тақырыбында да пікір алмасты. Дастан Дюшекеев қарақұйрық популяциясына қатысты және шекара маңы аумақтарындағы өрт тақырыбын көтерді. Алдағы уақытта бұл мәселені толық талқылап, екі жақты оң шешімге қол жеткізілетініне сенім білдірді.