Бразилиялық ғалым «Достық» орденімен марапатталды
Нұр-Сұлтан, BAQ.KZ. Рио-де-Жанейродағы Аннита Порту Мартинс атындағы қалалық кітапханада Қазақстан мен Бразилия арасындағы достық қарым-қатынастарды нығайтуға қосқан елеулі үлесі және қазақтың ұлы ақыны, философ және ағартушысы Абай Құнанбайұлының мұрасын дәріптеуге сіңірген еңбегі үшін Флуминенсе федералды университеттің оқытушысы Эдельсио Америкоға II дәрежелі «Достық» орденін табыстау рәсімі өтті.
Сол күні қазақ әдебиеті классигінің 175 жылдығын мерекелеу аясында Э.Америконың португал тіліне аударған «Қара сөздері» кітабының тұсаукесері және кітапхананың оқу залдарының біріне Абай атын беру және ақынның тиісті тақтайшасы мен портретін қою рәсімі өтті.
Іс-шараны ашқан Қазақстан Елшісі Қайрат Саржанов Президент Қасым-Жомарт Тоқаевтың Абай шығармаларын әлемнің ең көп таралған тілдеріне аударуы және басып шығаруы адамзатқа қазақ мәдениетінің жаңа қырларын ашатын және бүкіл әлемнің оқырмандарына ақынның өзіндік шығармашылығымен танысуға мүмкіндік беретін бірегей халықаралық мәдени жоба екендігі туралы сөздерін келтірді. Сонымен қатар, ол Абайдың қазақ мәдениетін дамытудағы ерекше рөлін және «Қара сөздердің» маңыздылығын атап өтті, онда классик ұлттық дүниетаным мен жалпыадамзаттық мораль мәселелерін көтереді.
Рио-де-Жанейро қаласының Мәдениет мәселелері жөніндегі хатшысы Розели Дуарте өз сөзінде халықаралық мәдени алмасудың маңыздылығы туралы мәлімдеді және қала әкімшілігінің Қазақстанмен достық қарым-қатынастарды нығайтуға, оның ішінде іс-шараларды ұйымдастыру арқылы нығайтуға дайын екенін, бұл сондай-ақ саяси диалогты дамытуға және елдер арасындағы сауда-экономикалық ынтымақтастықты ілгерілетуге ықпал ететінін айтты.
Тұсаукесер алдында ү.ж. 3-4 қарашада Елшілік Рио-де-Жанейро әкімшілігінің мәдениет хатшылығымен бірлесіп ұйымдастырған Абайдың өмірі мен шығармашылығы, оның қазақ руханиятындағы рөлі, шығармаларының құндылықтары, поэтикалық тілдің сұлулығы мен философиялық тереңдігі тақырыбындағы онлайн семинар өтті. Оның аясында Абайдың шығармашылығы туралы тақырыптық кордел-кітапшасын (португал тілінен cordel жіп деген мағына береді) жасау бойынша сабақтар өтті. Іс-шара бразилиялық аудиторияға кордел-кітапшасын жасау арқылы Қазақстанның әдеби және тарихи-мәдени мұрасымен танысуға мүмкіндік берді. Бұл дәстүр XVI ғасырда Португалияда қайта өрлеу дәуірінде пайда болды және Бразилияда халықтық сүйіспеншілікке ие болды, халықтық мәдениеттің дәстүрлі жанрына айналды. Семинар әйгілі бразилиялық жазушы және «Entre Poetas e Poesias» әдеби порталының колумбисті Хосе Вашингтон де Соуздың жетекшілігімен, Зе Сальвадордың әдеби лақап атымен танымал және жоғарыда аталған аудармашының қатысуымен өтті.
Іс-шара қатысушыларын Қазақстан туралы, туристік әлеует және мәдени мұра туралы бейнероликтер, оның ішінде Елшілік TV-Supren телеарнасымен бірлесіп дайындаған Абай туралы фильм көрсетілді.
Іс-шараға жергілікті билік органдарының, ғылыми, академиялық және бизнес топтардың, дипломатиялық корпус пен БАҚ өкілдері қатысты.