БҚО-да 302 мың тонна астық жиналды

Бұл туралы Батыс Қазақстан облысының әкімі Нариман Төреғалиев Орталық коммуникациялар қызметінің алаңында өткен баспасөз мәслихатында мәлімдеді, деп хабарлайды BAQ.KZ тілшісі

Батыс Қазақстан облысы бойынша барлық ауыл шаруашылығы дақылдарының егіс алқабы - 617 мың га құрады.

Дәнді дақылдар - 306 мың га, майлы дақылдар - 112 мың га, мал азықтық дақылдар - 189 мың га, картоп, көкөніс-бақша дақылдары - 10 мың га.

Бүгінгі таңда егін ору науқаны толықтай аяқталып, облыс бойынша 302 мың тонна астық жиналды (10,1 ц/га). Майлы дақылдардан 78 мың тонна өнім алынды. Сондай-ақ, 153 мың тонна картоп, көкөніс-бақша өнімі жиналды. Облыста қуаты жылына 11 мың тонналық голландиялық технологиямен 2 заманауи өндірістік жылыжай жұмыс жасап тұр. Облыстың маусым аралық кезеңде картоп-көкөніс өнімдерін сақтау қажеттілігі 70 мың тоннаны құрап отыр. Ағымдағы жылы 91 мың тонна картоп-көкөніс өнімдері жиналып, бүгінгі таңда сыйымдылығы 52 мың тонна болатын 32 картоп-көкөніс қоймаларында сақталуда, - деді өңір басшысы.

Облыс халқының көкөніс өнімдеріне қажеттілігін 100% жабу үшін 2024 жылы 18 мың тонналық 4 қойма салынып қажеттілік толық жабылатын болады.

2026 жылға дейін 30 мың тонналық 17 қойма салуды жоспарлап, қажеттілік 128%-ға дейін жеткізетін боламыз.