Бозымбаев Ақмола облысында су тасқынынан кейінгі үйлердің құрылысын тексерді

Ақмола облысына жұмыс сапары аясында вице-премьер Қанат Бозымбаев су тасқыны салдарын жою және зардап шеккендерге келтірілген залалды өтеу қарқынын тексерді, деп хабарлайды BAQ.KZ Үкіметтің ресми сайтына сілтеме жасап.

Өңірде барлығы 551 үй қалпына келтірілмейтіні анықталды. 172 отбасына қайталама нарықтан тұрғын үй сатып алынды. Сонымен қатар 273 үйдің құрылысы басталды. Құрылыс жұмысы облыстың төрт ауданында: Атбасар, Бұланды, Жарқайың және Есілде жүргізілуде. Нысандарға 330-ға жуық жұмысшы мен 55 бірлік арнайы техника жұмылдырылды.

«Қазақстан халқына» қоры Бұланды және Жарқайың аудандарында 87 үй салып жатыр. Қанат Бозымбаев мердігер ұйымдардың жұмысын тексерді. Ақмола облысының әкімі Марат Ахметжановтың айтуынша, салынып жатқан үйлерде барлық инженерлік коммуникациялар жүргізілген. Жұмыс көлемі 40%-ға жетті.

«Асар Ақмола» қоры Атбасар ауданында 100 пәтерлі үй салып жатыр. Мұнда іргетас құю аяқталып, кірпіш қалау жұмысы басталды. Нысанды тапсырудың жоспарланған мерзімі – қараша айының соңы.

Жұмыс сапары барысында Қанат Бозымбаев Атбасар қаласына барып, үш көппәтерлі үйдің құрылысымен танысты. Екі үйде абаттандыру және интерьерді безендіру жұмыстары жүргізілуде. Жұмыстың аяқталу мерзімі — тамыз айының соңына дейін.

Сонымен қатар вице-премьер Атбасардағы №1 мектептің жөндеу жұмысын тексерді. Сәуірде ғимараттың бірінші қабатын су басқан болатын. Құрылыс бригадалары мектепті 1 қыркүйекке дейін тапсыруға уәде береді.

Сапар қорытындысы бойынша Қанат Бозымбаев Атбасар әкімдігіне Жабай өзенінің түбін тазартуды және қаланы қайта су басуына жол бермеу үшін жағалау бойында қорғаныс құрылыстарын салуды тапсырды. Ол үшін Атбасарға су ресурстары және ирригация министрлігінің мамандары жіберіледі.