"Болашақ": Шетелдік жоғары оқу орындарының тізімі бекітілді

Нұр-Сұлтан, BAQ.KZ. "Болашақ" бағдарламасы шеңберінде 2020 жылы оқуға ұсынылатын шетелдік жоғары оқу орындарының тізімі бекітілді.

ҚР Білім және ғылым министрінің 2020 жылғы 13 шілдедегі № 295 бұйрығымен 2020 жылы "Болашақ" бағдарламасы шеңберінде оқуға ұсынылатын шетелдік жоғары оқу орындарының тізімі бекітілді. 

"Болашақ" халықаралық стипендиясын тағайындау үшін үміткерлерді іріктеудің жаңа ережелеріне енгізілген өзгерістердің нәтижесінде шетелдік жоғары оқу орындарының тізімі сапалық және сандық жағынан өзгерді, - делінген хабарламада.

Оған екі және одан да көп Халықаралық академиялық рейтингтердің топ-100 кіретін 138 шетелдік ЖОО кірді, атап айтқанда: QS World University Rankings, Academic Ranking of World Universities, Times Higher Education World University Rankings, the U. S. News & World Report Best Global University ranking. 

Тізімге сонымен қатар, The U.S. News & World Report Best Global University Ranking басылымының нұсқасы бойынша үздік әлемдік университеттер рейтингінде кемінде 65 балл жинаған Экономикалық ынтымақтастық және даму ұйымы (ЭЫДҰ) елдерінің жоғары оқу орындары енді.   

Салыстыратын болсақ: 2019 жылы ұсынылған шетелдік жоғары оқу орындарының тізімінде 537 жоғары оқу орны болса, оның 20% ғана топ-100 халықаралық рейтингтеріне кірген.      

Сондықтан, 2020 жылғы тізімде еліміздің нысанды қажеттіліктеріне сәйкес бағыттар бойынша мықты болып саналатын әлемнің жетекші жоғары оқу орындары ұсынылуда.   

Ұсынылатын шетелдік жоғары оқу орындарының тізімімен "Халықаралық бағдарламалар орталығы" АҚ ресми сайтында мына сілтеме бойынша танысуға болады.