Бизнеске ұзақ мерзімді несиелер жетіспейді – Бектенов

Қазақстанда инвестициялық жобалар бюрократияның кесірінен тежеліп, банктер нақты секторға несие беруге құлықсыз. Бұл туралы Премьер-министр Олжас Бектенов мәлім етті, деп хабарлайды BAQ.KZ тілшісі.

Бірінші – инвестициялық жобаларды пысықтау кезінде мемлекеттік органдардың сылбыр қимылы. Белсенді жұмыс байқалмайды. Біз ұзақ келісу рәсімдері мен бюрократиялық кедергілердің кесірінен немесе ведомствоаралық өзара байланыстардың жоқтығынан болашағы зор бастамалардың баяулап қалғанын көріп жүрміз. Жақында мен инвестициялық ахуалға арналған кеңес өткіздім. Көп уақыт бойы созылып келген сұрақтар сол арада бірден шешімін тапты. Барлық мемлекеттік органдар ” бюрократияға мүлде жол жоқ” қағидаты бойынша жұмыс істеуге тиіс, – дейді Олжас Абайұлы.

Сондай-ақ Бектеновтің сөзінше, бизнеске ұзақ мерзімді кредиттер жетіспейді.

Банктер қысқа мерзімді әрі тәуекелі аз кредит бергенді дұрыс көреді. Ал нақты секторға қолжетімді және ұзақ мерзімді қаржы ресурстары қажет. Үшінші – мемлекеттік қаржы институттары мен екінші деңгейдегі банктер арасындағы бәсекелестік. Мемлекеттік даму институттары жобаларға негізінен өздері қаржы бөліп келеді. Бұл банктердің нақты секторға деген қызығушылығын төмендетеді, – деді Бектенов.

Еске сала кетейік, осыған дейін Үкімет отырысында Қазақстанда бизнесті қаржылай қолдау жаңа деңгейге көтерілетіні айтылды.

Сондай ақ Премьер-министр Олжас Бектенов Көлік министріне вокзалдардың құрылыс жұмыстарын аяқтауды тапсырғаны туралы да жазғанбыз.