Биыл пайдалануға берілген тұрғын үй көлемі артты

Нұр-Сұлтан, BAQ.KZ. Былтыр елімізде 17,1 млн шаршы метр тұрғын үй пайдалануға берілді. Бұл арғы жылмен салыстырғанда 11,4% көп.

Бұл туралы ИИДМ баспасөз қызметі хабарлады.

Республика бойынша барлығы 151 192 баспана, оның ішінде 41 250 жеке тұрғын үй пайдалануға берілді.

 Салаға салынған инвестиция көлемі 2,4 трлн теңгеге жетіп, 2020 жылдың сәйкес кезеңіне қарағанда 19,1% артты. Тұрғын үйді пайдалануға беру көлемі арғы жылмен салыстырғанда барлық өңірде дерлік өскен.

Атап айтқанда, Маңғыстау (119%), Ақмола (115,8%), Жамбыл (112,9%), Павлодар (112,3%) облыстары, сондай-ақ Алматы қаласы (116,6%) және Шымкент қаласы (116,1%) көш басында.

Осы ретте Қарағанды (98,5%) және Қызылорда (93,8%) облыстарын қоспағанда, Қостанай (109,8%), Алматы (109,7%), Шығыс Қазақстан (107,4%), Атырау (106,2%), Солтүстік Қазақстан (105,8%), Батыс Қазақстан (105,1%), Түркістан (104,1%), Ақтөбе (104%) облыстарында, Нұр-сұлтан қаласында (104,6%) оң серпін байқалады, -делінген министрлік мәліметінде.