Биыл 92 елді мекен газбен қамтылады

Биыл елімізде 92 елді мекен көгілдір отынмен қамтамасыз етіледі, деп хабарлайды BAQ.KZ тілшісі. 

Бұл туралы Премьер-министрдің бірінші орынбасары Роман Скляр Үкімет үйінде өтіп жатқан баспасөз конференциясында мәлімдеді. 

Мұнай-газ саласында 1-ші жартыжылдықтың қорытындысы бойынша 7,6 млн тонна мұнай өнімдері өндірілді. Ал жылдық жоспары – 14,8 млн тонна. Биыл 62 млрд м³ газ өндіру жоспарланған. 94 елді мекен газбен қамтамасыз етіледі, 300 мыңнан астам адам көгілдір отынға қол жеткізеді, - деп атап өтті вице-премьер.

Айтуынша, қыркүйек айында ұзындығы 302 км болатын "Талдықорған – Үшарал" магистральдық газ құбыры іске қосылады.

Бұл 60-тан астам елді мекенді газбен қамтамасыз етуге мүмкіндік береді. Сәуір айында "Бейнеу-Бозой-Шымкент" Магистральдық газ құбыры екінші желісінің құрылысы басталды. Оны келесі жылдың соңына дейін пайдалануға берілу жоспарланып отыр, - деді Роман Скляр.

Сонымен қоса мұнай-газ химиясы саласына да тоқталды.

Мұнай-газ химиясы саласында 6 айдың қорытындысы бойынша 380 мың тоннадан астам өнім өндірілді. Бұл былтырғы деңгейден 12,7%-ға артық. Энергетика саласында биыл бірінші жартыжылдықта 62,2 млрд кВт/сағ электр энергиясы өндірілді, бұл өткен жылдың деңгейінен 3,3%-ға жоғары. 2028 жылға қарай жалпы қуаттылығы шамамен 6700 МВт болатын жаңа генерация іске қосылады. Оның ішінде биыл дәстүрлі және баламалы қуат көздері бойынша 620 МВт енгізіледі, - дейді Үкімет басшысының бірінші орынбасары.

Бұған дейін Премьер-министрдің бірінші орынбасары Роман Скляр қызметтен қашан кететінін айтты. Сондай-ақ ол Қазақстанда өнеркәсіпте жарты жыл ішінде өндіріс көлемі 28,9 трлн теңгені құрағанын мәлімдеді.