Бішкекте шетел азаматтарына шабуыл жасады деген үш күдікті ұсталды

Бішкекте хостелдердің бірінде шетел азаматтарына қарақшылық шабуыл жасады деген күдікпен үш жігіт ұсталды, деп хабарлайды BAQ.KZ.

Елдің ішкі істер министрлігінің баспасөз қызметі таратқан мәліметке сәйкес, күдіктілер уақытша ұстау изоляторына жеткізілді. Қылмыстық іс бойынша тергеу жалғасуда.

Еске салайық, 13 мамыр күні түнде сағат шамамен 02:00-де «Восток-5» шағын ауданында бір топ жігіттер шетел студенттерімен төбелескен.

Студенттер өздері тұрған хостелге қарай қашқан.

Олардың соңынан кірген белгісіз топ сол жерде тұрып жатқан шетел азаматтарының ақшалары мен заттарын тонап кеткені белгілі болды.

Аталған оқиғадан соң Қырғызстан Республикасы қылмыстық кодексінің 207-бабы бойынша қылмыстық іс қозғалды.