Бірінші сыныпқа құжаттарды қабылдау 20 тамызға дейін ұзартылды

Нұр-Сұлтан, BAQ.KZ. Елімізде карантиндік режимнің ұзартылуына байланысты ҚР Білім және ғылым министрлігі бірінші сыныпқа құжаттарды қабылдау мерзімін 20 тамызға дейін ұзартады. 

Бірінші сыныпқа құжаттарды қабылдау 1 тамызда аяқталуы тиіс еді, бірақ елімізде карантин режимінің ұзартылуына байланысты өтініштерді қабылдауды 20 тамызға дейін ұзарту туралы шешім қабылданды. Бүгінгі күні 350 мыңға жуық өтініш түсті. Олардың басым көпшілігі egov.kz "электрондық үкімет" порталы арқылы қабылданды.

Медициналық анықтамаларды алу кезіндегі қиындықтарға байланысты білім беру ұйымдарына құжаттар тапсыру кезінде оларды ұсынбауға уақытша рұқсат етіледі. Медициналық анықтамаларды мүмкіндік болған кезде тапсыруға болады.

Бастауыш сынып оқушыларының ата-аналарының жазбаша өтініші бойынша, білім беру ұйымында жағдай болса, бірінші тоқсанда қатаң санитарлық шараларды сақтай отырып, кезекші сыныптардың жұмыс істеуі ұйымдастырылатынын естеріңізге саламыз, - делінген хабарламада.