Бір тәулікте 42500.enbek.kz сайтына 27 мыңнан аса өтініш келген

Нұр-Сұлтан, BAQ.KZ. Төтенше жағдай кезінде табысынан айырылуына байланысты азаматтардың әлеуметтік төлем алуға өтініштерін қарау тәулік бойы жүргізіледі.

2020 жылғы 21 сәуірдегі жағдай бойынша https://42500.enbek.kz сайтына 150 мың өтініш түскен. Оның ішінде 27 мыңнан астам өтініш тек 20 сәуір күні келіп түсті.

Еңбек және халықты әлеуметтік қорғау министрлігінің "Еңбек ресурстарын дамыту орталығы" АҚ мамандары әрбір өтінішті жеке қарап, азаматтарға көмек көрсетеді.

Орталық қызметкерлері күніне орташа есеппен 5000 өтінішке жауап береді. Айта кетсек, 21 сәуір күні 13 мыңнан астам өтінішке жауап берілді. Мамандардың айтуынша, көптеген өтініштер бірыңғай жиынтық төлемге (БЖТ) қатысты.

Жиі туындайтын мәселе: азамат 42500 теңге алуға өтінім жіберген кезде оған әлеуметтік төлем берілмейді деген жауап келді, себебі ол бірыңғай жиынтық төлемді төлемеген. Кейін ол БЖТ төлейді де, бірден қайтадан өтініш береді. Оған тағы да берілмейді деген жауап келеді. Себебі, Сіз төлеген БЖТ бірден базаға түспейді (банктік 3 күн қажет). Ал, жүйе өтінішті автоматты түрде қарайды да, төлем беруден бас тартады. БЖТ төленді деп базада шыққанша, азаматтар неге маған берілмейді? неге жоқ деген жауап келді? деп 5-6 рет өтініш жіберіп үлгереді. Біз осындай өтінішті көрген кезде азаматтың арызы бойынша базадан тексеріп, оған әлеуметтік төлем тағайындалғанын көріп, алаңдаудың қажеті жоқ, қаржы жақын уақытта шотыңызға түседі деп сабырлыққа шақырып, жауап жазамыз, - дейді орталық қызметкері Ардақ Абдельдинов.

Естеріңізге сала кетсек, ҚР Үкіметі 42 500 теңге әлеуметтік төлемді алуға қатысты азаматтардың өтініштерін (арыздарын) қарастыратын 4 мекемені анықтаған болатын. Олар:

1) 1414 call-орталығы. «Азаматтарға арналған үкімет» АҚ-ның 1414 call-орталығы жүгінген адамның мәртебесі және әлеуметтік төлемдерді алу құқығы, сондай-ақ төлемді жүзеге асыру туралы ақпарат айқындалады.

2) 1411 call-орталығы. "Азаматтарға арналған үкімет" АҚ мемлекеттік корпорациясының Мемлекеттік әлеуметтік сақтандыру қоры" АҚ тікелей жұмыс істейтін call-орталығы. Бұл жерде азаматтарға төлем тағайындау, төлемнің кешіктірілу себептері және төлемді беруден бас тарту туралы ақпарат ұсынылады.

3) ҚР Еңбек және халықты әлеуметтік қорғау министрлігінің "Еңбек ресурстарын дамыту орталығы". Бұл мекеме азаматтар қате ұсынған банктік шоттың нөмірлері мен ЖСН-ін анықтап, өтініш берушілерге дұрыс деректерді қайта ұсыну үшін хабарлама жібереді. Азаматтардың түзетілген деректері негізінде оларға 42500 теңгені тағайындау үшін "Мемлекеттік әлеуметтік сақтандыру қоры" АҚ-на жібереді.

4) ҚР Еңбек және халықты әлеуметтік қорғау министрлігінің 42500.enbek.kz сайты. Бұл сайтта  азаматтарға әлеуметтік төлем тағайындау бойынша барлық мәселелер қарастырылады.