Бетпе-бет соқтығысқан: Алматыда жол апатынын жүргізуші қаза тапты

Алатау ауданында екі көлік соқтығысып, нәтижесінде бір жүргізуші оқиға орнында қаза тапты, деп хабарлайды  Алматыдағы BAQ.KZ тілшісі.

Жол-көлік оқиғасы 18 шілде күні сағат 6:30-да Саин көшесінде болған.

Dodge автокөлігінің жүргізушісі Саин көшесімен оңтүстік бағытта келе жатып, Аққайнар көшесінің қиылысында қарсы жолаққа шығып кетіп, қарсы бағытта келе жатқан Kia көлігімен соқтығысқан, – деді қалалық полиция.

Жол апаты салдарынан Kia көлігінің жүргізушісі оқиға орнында қаза тапты, ал Dodge көлігін жүргізген азамат қаладағы ауруханалардың біріне жеткізілді.

Куәгерлердің айтуынша, апат бетпе-бет соқтығысу салдарынан болған.

Аталған факті бойынша Алматы қалалық полиция департаментінің анықтау басқармасы қылмыстық іс қозғады. Қажетті сараптамалар тағайындалды.