Бекшин вакцина салдырды

Алматы, BAQ.KZ тілшісі. Бүгін Алматыдағы №5 қалалық ауруханада денсаулық сақтау мекемелерінің басшылары вакцина салдырды.

Алматы қаласы бас мемлекеттік санитар дәрігері Жандарбек Бекшин және қала әкімінің орынбасары Ержан Бабақұмаров, Қоғамдық денсаулық сақтау басқармасының басшысы Нариман Табынбаев алғашқылардың бірі болып коронавирусқа қарсы вакцина салдырды.

Ресейде дайындалған «Спутник V» вакцинасының 2050 дозасы кеше Алматыға жеткізілген болатын.

Қала әкімінің орынбасары вакцина салдырудан бұрын БАҚ өкілдерінің көп жиналғаны үрейлендіргенін айтты. Ал Бекшин еш уайымдамағанын жеткізді.

Бұл - қауіпсіздігі дәлелденген вакцина. Ресейде 2 млн-дай адам бұл екпені салып үлгерді. Бұл вакцинаның сапасына, тиімділігіне еш күмән келтірмеймін, - деді Ж. Бекшин.

Вакцина салудың бірінші кезеңінде инфекциялық аурулардың жедел медициналық көмек, реанимация бөлімшесі, қабылдау бөлімшесінің қызметкерлері, санэпид қызметкерлеріне екпе салынады.

Екінші кезеңде жалпы білім беретін мектеп, жоғары және арнаулы орта білім беретін оқу орындарының мұғалімдері, медициналық қызметкерлерге салынады.

Үшінші кезең бойынша екпе 1 сәуірден бастап салынады екен. Ол кезде мектеп-интернат мұғалімдері, мектепке дейінгі мекеме қызметкерлері, студенттер мен созылмалы ауруы бар науқастарға салынады.