Бас прокуротура Перумен қылмыстық-құқықтық саладағы шарттарға қол қойды

Қазақстан Республикасының Бас прокуратурасы Латын Америкасы елдерімен қылмысқа қарсы күрес саласындағы халықаралық-құқықтық ынтымақтастықты арттыруды жалғастыруда, деп хабарлайды BAQ.KZ.

Бүгін Астанада Қазақстан Республикасы мен Перу Республикасы арасында қылмыстық істер бойынша өзара құқықтық көмек көрсету, сотталғандарды экстрадициялау және беру туралы шарттарға қол қойылды.

Қылмыстық істер бойынша өзара құқықтық көмек көрсету туралы шарт күдіктілердің қылмыстарды жасауда кінәсін дәлелдейтін дәлелдемелерді ұсыну бойынша екі елдің құқық қорғау органдарының өзара іс-қимылына бағытталған.

Экстрадициялау туралы шарт тараптарға қылмысты бір елде жасап, қылмыстық қудалау мен сот төрелігі органдарынан екінші елде жасырынған адамдарды бір-біріне ұстап беруге мүмкіндік береді.

Сотталғандарды беру туралы шарт шет мемлекетте бас бостандығынан айыруға сотталған және жазасын өз отанында өтеуге ниет білдірген тараптардың азаматтарын беру тәртібін реттейді.

Осылайша, Қазақстан үшін Перу қылмыстық сот ісін жүргізу саласында толық халықаралық құқықтық база қалыптасқан Латын Америкасының тағы бір елі болды.

Бұдан бұрын Қазақстан Республикасы Бразилия Федеративтік Республикасымен осындай халықаралық келісімдер жасалғанын еске сала кетейік.

Жақын арада Аргентинамен және Доминикан Республикасымен осындай құжаттарға қол қою жоспарлануда.

Оларға қол қою қажеттілігі соңғы кездері іздестіріліп жүрген адамдар қазақстандық құқық қорғау органдарынан жиі Латын Америкасы елдерінде, мысалы, Бразилияда, Эквадорда, Аргентинада, Доминикан Республикасында және осы континенттің басқа мемлекеттерінде де жасырынуына байланысты туындады.