Балқашта алғаш рет су құбыры желілерін ауыстыру бойынша ауқымды жұмыстар атқарылады

Нұр-Сұлтан, BAQ.KZ. Балқаштықтар Қарағанды облысының әкімі Жеңіс Қасымбектің халықпен есептік кездесуінде жолдардың қанағаттанарлықсыз жағдайына шағымданды. Олар шұңқырларға және қырлы тастардың сапасыз төселгеніне наразы. 

Бұл туралы Қарағанды облысы әкімдігінің баспасөз қызметі хабарлады.

Бірақ жергілікті билік бәрін түзетуге уәде бере алмады, себебі қалада алғаш рет су желілерін ауқымды қайта құру күтілуде.

Балқашта құбырлардың тозуына байланысты жиі апаттар болады.

– Біз көшелердің 30% жуығын қазып жатырмыз, сондықтан жолдарды жөндеу немесе төсемтас төсеу туралы айту қисынсыз және тиімсіз. Есесіне бұл жөндеу жұмыстары апаттардың санын азайтып, судың сапасы жақсарып, қысым тұрақты болуына септігін тигізеді, – деді Балқаш қаласының әкімі Ораз Тәуірбеков.

Облыс әкімінің тұрғындармен кездесуі жергілікті мәдениет үйінде өтті. Еркін микрофон форматында тұрғындар қаланың өзекті мәселелерін айтты.

Мысалы, балқаштықтарды әуежайдың алдағы тағдыры алаңдататыны белгілі болды. Жеңіс Қасымбек әуе айлағы қаланың коммуналдық меншігіне берілгенін еске салды. Жақын арада жөндеу жұмыстары жүргізіледі. Жазда Нұр-Сұлтан – Балқаш – Алматы бағыты бойынша 10 рейс іске қосылады.

Темір жол бойынша да сұрақ түсті. Қала тұрғындары Балқаш-Алматы бағытында пойыз жіберуді сұрады.

ТКШ саласынан да өтініштер аз болған жоқ, атап айтқанда, Шұбартүбек мен Тораңғалықтағы ауыз су мәселесі қозғалды. Жергілікті биліктің айтуынша, "Қазақмыс" су құбыры және кәріз желілерінің құрылысына ЖСҚ-ны әзірлей бастады, содан кейін құрылыс басталады.

– Барлық көтерілген мәселелер назардан тыс қалмайды. Мен сіздермен кездесіп, барлық мәселелерді талқылау үшін арнайы келдім, – деді Жеңіс Қасымбек. 

Сондай-ақ, облыс әкімі азаматтарды жеке қабылдады. Кейбір тұрғындар Сванқұлов орамында балабақша салуды сұрады, ал басқалары Саяқ кентінде ауыз судың тұрақты берілуіне қатысты алаңдады, қала тұрғындары сонымен қатар тұрғын үй мәселесі және Балқаштың көрікті жерлерінің жағдайына алаңдайтындарын жеткізді.

Тұрғындарға Тоқырау – Саяқ су тартқышын жөндеу жұмыстары жалғасып, екі жыл ішінде бір балабақша қалпына келтіріліп, үш жаңа балабақша салынатыны мәлімделді.

Биыл облыс әкімінің халықпен есептік кездесуі әр қала мен ауданда өтуде. Кесте әкімдіктердің ресми сайттары мен аккаунттарында жарияланады. Келесі кездесу Шет ауданында өтеді.