Балаева: Қайырымды іс жасар кезде жауапкершілікті де естен шығармайық

Мәдениет және ақпарат министрі Аида Балаева тасқын судан зардап шеккендерге көмек көрсетуге ниетті жандар хабарласып, көптеген өтініш түсіп жатқанын айтты, деп хабарлайды BAQ.KZ.

Балаева Facebook-тегі парақшасында жазба қалдырып, еліміз қазір қиын кезеңді бастан кешіп жатқанын атап өтті. Дегенмен тілсіз жауды ауыздықтау оңай болмаса да, халықтың бірлігі мен ынтымағы арқылы бұл сынақты да еңсеретінімізге сенімін білдірді.

Құрметті достар! Еліміз қазір қиын кезеңді бастан кешіп жатыр. Қарғын су ауыл-аймақты басып, халықтың үй-жайы мен мал-мүлкіне орасан зор шығын келді. Мұндай қиын-қыстау кезде ел азаматтары жұдырықтай жұмылып, бір-біріне көмек қолын созуда. Әрине, тілсіз жауды ауыздықтау оңай болмаса да, халықтың бірлігі мен ынтымағы арқылы бұл сынақты да еңсереміз деп сенеміз. Осы уақыт ішінде бізге зардап шеккендерге көмек көрсетуге ниеті жандар хабарласып, көптеген өтініштер түсті. Гуманитарлық көмекті қайда және қалай жіберуге болады деген сұрақтар көп. Қаражатты қай қорға және қандай шотқа аударуға болады? Бұл ретте, тек ресми ақпарат көздеріне сенуге шақырамыз. Ресми түрде жұмыс істейтін қорлар туралы ақпаратты жергілікті атқарушы органдарға хабарласып, біле аласыздар. Қайырымды іс жасар кезде жауапкершілікті де естен шығармайық, - деп жазды министр.