Бүгінгідей күрделі кезеңде мұғалімдерімізге аз салмақ түсіп отырған жоқ – Әшімбаев

Нұр-Сұлтан, BAQ.KZ. Парламент Сенатының төрағасы Мәулен Әшімбаев ұстаздарды төл мерекесімен құттықтады. 

Еліміздегі барша ұстаздар қауымын бүгінгі кәсіби мерекелерімен құттықтаймын! «Ұстаздық ету – ұлы қызмет» деген қанатты сөз бар. Шын мәнінде, әлі оң-солын толық танып үлгермеген баланың өмірден өз орнын тауып, адам болып қалыптасуында мұғалімнің еңбегі зор. Сондықтан ұстазға құрмет көрсету – әрқайсымыздың азаматтық парызымыз, - деп жазды ол.

Ол ұстаздарымыз осындай сын сағатта еш мойымай, ұлт болашағын бәрінен биік қойып, өз кәсібіне деген адалдықтың озық үлгісі деп атып өтті. 

Бүгінгідей күрделі кезеңде мұғалімдерімізге де аз салмақ түсіп отырған жоқ. Соған қарамастан жастарымыздың сапалы білім алуына бар күш-жігерін жұмсап жүрген ардақты жандарға алғысымыз шексіз. Ұстаздарымыз осындай сын сағатта еш мойымай, ұлт болашағын бәрінен биік қойып, өз кәсібіне деген адалдықтың озық үлгісін көрсетіп келеді, - деп жазды Әшімбаев.

Сенат төрағасы Президентіміздің биылғы Жолдауында да білім беру ісі ел дамуының ең негізгі басымдықтарының бірі екенін айтып өтті. 

Қазіргі таңда мемлекет тарапынан мұғалімдер үшін барлық жағдай жасалуда. Оған «Педагог мәртебесі туралы» заңның қабылдануы айқын дәлел. Президентіміздің биылғы Жолдауында да білім беру ісі ел дамуының ең негізгі басымдықтарының бірі екені айтылды. Соның аясында мұғалімдердің жалақысын көтеру, болашақ педагогтердің стипендиясын көбейту сияқты маңызды міндеттер жүзеге асырылып жатыр. Осындай игі бастамалар алдағы уақытта да жалғаса беретіні анық. Барша ұстаздарымызды кәсіби мерекелерімен құттықтай отырып, жұмыстарына толайым табыс, шаңырақтарына шаттық тілеймін. Жетістігімен қуантар шәкірттеріңіз көп болсын, - деп жазды Сенат төрағасы.