Айлықтың жартысы азық-түлікке кетеді. Тоқаев қымбатшылық мәселесін көтерді

Еліміздің әлеуметтік-экономикалық дамуы жөнінде кеңесте Мемлекет басшысы Қасым-Жомарт Тоқаев елдегі қымбатшылық мәселесін көтерді, деп хабарлайды BAQ.KZ тілшісі.

Мемлекет басшысы атап өткендей, соңғы 15 жылда азық-түлік бұрын-соңды болмаған бағада өсті. Салдарынан биылғы ақпан айында инфляция 21,3%.

Жұрттың ай сайын жұмсайтын қаржысының тең жартысынан көбі азық-түлік алуға кетеді. Үкіметтің әрекеті жеткіліксіз болып отыр. Тыйым салу және шектеу шаралары уақытша ғана әсер етеді, - деп айтты Президент кеңесте.

Тоқаев мұндай қадамдар қиындықтың бетін қайтарса да, одан біржола құтылуға мүмкіндік бермейтінін, тіпті, мәселені ушықтыратынын айтты.

Ауыл шаруашылығы және өндіріс саласының дамуында нақты нәтиже жоқ. Азық-түлік инфляциясының басты себебі де – осында. Елімізде өндірілетін тауардың көлемі ішкі сұранысты қамтамасыз етуге жетпейді. Импортқа тәуелдіміз, - деп түсіндірді Қасым-Жомарт Тоқаев.

Еске сала кетейік, Тоқаевтың төрағалығымен еліміздің әлеуметтік-экономикалық дамуы жөнінде кеңес өтуде. Кеңес барысында Мемлекет басшысы еліміздегі қоғамдық-экономикалық қатынастарды қайта құру керек екенін айтты.

Сонымен қатар, Тоқаев табысты елде тауып, шетелге шашатындар туралы айтқан болатын.