«Айбоз» ұлттық әдеби сыйлығы. Жеңімпазға қандай жүлде беріледі?

Еліміздің әдебиет саласына көптеген игі  істер атқарылып жатыр. Соның бірі – «Айбоз» ұлттық сыйлығы. Бұл туралы Архив және құжаттаманы басқару комитетінің төрағасы Қуат Бораш айтты, деп хабарлайды BAQ.KZ тілшісі. 

«Айбоз» ұлттық сыйлығы – мемлекет тарапынан қаламгерлер мен баспагерлерге қолдау көрсету және ынталандыру мақсатымен ұйымдастырылған сыйлық. 

Спикердің мәлімдеуінше, әдеби сыйлық жеті номинация бойынша беріледі. Жыл соңында салтанатты түрде қорытындыланады.

Жоба басталғанына екі ай өтті. Қазіргі таңда бір ай уақыт қалды. Жалпы, ұлттық әдеби сыйлықта Үздік поэзия, Үздік проза, Үздік драматургия, Үздік балалар әдебиеті, Үздік аударма және Үздік комикс пен кітап бойынша номинациялар бар. Әр номинацияның жеңімпазына  5 млн теңге жүлде тағайындалған. Сонымен бірге биыл үздік комикс пен үздік кітап жобаға алғаш рет қосылып отыр. Кітап шығару мәдениеті еліміз үшін маңызды. Және де жаңа ұрпақты ұлттық рухта тәрбие беру үшін комикс жанрын жандандыру біздің негізгі мақсатымыз, – деді Қуат Бораш орталық коммуникациялар алаңында өтіп жатқан баспасөз мәслихатында.