Аяғы жұлынып қалған: Маңғыстауда ер адамды пойыз қағып кетті

Маңғыстауда ер адамды пойыз қағып кетіп, күрделі жарақат алды, деп хабарлайды BAQ.KZ.

"Қазақстан темір жолы" таратқан ақпаратқа сәйкес, оқиға 28 ақпанда Боранқұл станциясында болған. Оқиғаның алдын ала себебі – теміржолды рұқсат етілмеген жерден кесіп өту.

Әлеуметтік желілерде оқиға орнынан қорқынышты кадрлар тарады. Ер адам Бейнеу станциясындағы аудандық ауруханаға жеткізілді.

Ұлттық компания теміржол – жоғары қауіптілікке ие аймақ екендігін ескертеді.

2024 жылы елде теміржолмен байланысты 75 апатты жағдай тіркелген. Оқиғалардың негізгі себебі – теміржол арқылы өту ережелерін бұзу, ішімдікке мас болу, теміржол арқылы құлаққап киіп өту және суицид жағдайлары.