«Ауыл» партиясының сайлауалды штабы өз жұмысын бастады

Астанада «Ауыл» халықтық-демократиялық  патриоттық партиясының сайлауалды штабының ашылуы өтті, деп хабарлайды BAQ.KZ тілшісі.

Барлық аудандарда штабтар ашылып отыр. 1500-ден астам штаб мүшелері жұмыс істейтін болады. Одан бөлек, өзіміздің сайлауалды іс-шаралар жоспарын бекітіп, кандидаттардың қатысуымен 5000-нан астам кездесу ұйымдастыруды жоспарлап отырмыз, – деді партия төрағасы Әли Бектаев құттықтау сөзінде.  

Ол сайлауалды насихат жұмыстарында барлық ауылдық елдімекендерді, қалаларды, аудан орталықтарын қамтуға әрекет жасау керегін айтты.

Сайлауға Астана қаласы бойынша «Ауыл» партиясынан тізім арқылы 7 үміткер және бірмандатты округ арқылы 4 үміткер ұсынылып отыр. Жалпы, сайлауға менімен қосқанда 12 үміткер түседі. Осы 12 адам бір-бірімізді қолдап, бірге жұмыс істейміз. Миллиондаған сайлаушының жүрегіне жету үшін жалғыз үміткердің мүмкіншілігі жоқ, – деді Парламент Мәжілісінің депутаттығына кандидат Төлеутай Рахымбеков.