Астананың су айдындарына ондаған мың шабақ жіберілді

Астананың және Қояндының су қоймаларына сазан балығының 12 мың шабағы жіберілді, деп хабарлайды BAQ.KZ елорда әкімдігінің ресми сайтына сілтеме жасап.

Олардың көлемі 2-3 сантиметрден аспайды. «Жас Нұр» өндірістік-шаруашылық кәсіпорны мамандарының айтуынша, алдағы жазда балық аулау маусымына қарай олар 35-40 сантиметрге дейін өседі, ал олардың салмағы 400 грамға жетеді.

«Жас Нұр» басшысы Нұржан Смағұлов балықтың бұл түрі температураның кез келген жағдайына өте төзімді, ащы да, тұщы да суда өмір сүретінін және Астана маңындағы су қоймаларында жарамды барлық нәрсемен қоректенетінін атап өтті.

Балықтың ерекше дәмінің арқасында қаладағы балықшылардың да қызығушылығы жоғары.

Шабақтар «Maybalyk» инкубациялық цехтарында өсірілді, ал «Жас Нұр» қызметкерлері су қоймаларына жеткізді. «Жас Нұр» екі су қоймасын ұзақ мерзімді жалға алған.

Оларды суға жіберу жыл сайын ұйымдастырылады. Мәселен былтыр Астананың және Қояндының су қоймаларына 20 мың ақ амур шабағы, ал 2021 жылы 90 мың мөңке шабағы жіберілді.

Келер жылдың көктемінде кәсіпорын су қоймаларындағы балық санын 2 миллион жас сарбоян тұқы балығымен толықтыруды жоспарлап отыр.

Балықтандыру биологиялық тепе-теңдікті сақтау және су кеңістігін табиғи тазарту мақсатында жүзеге асырылады.