Астанада үш жаңа учаскелік полиция пункті ашылды

Елордада "жұртқа жақын полиция" қағидатын іске асыру аясында үш жаңа учаскелік полиция пункті ашылды, деп хабарлайды BAQ.KZ Polisia.kz-ке сілтеме жасап.

Жаңа пункттер №7, №51 және №90 ретінде тіркеліп, олар қала тұрғындарына жақын орналасқан аудандарда жұмысын бастады.

№51 УПП – Нұра ауданында, Шафика Чокин көшесі, 6-үйде орналасқан. Шамамен 70 мың адамға қызмет көрсетеді. Аумағы – 78,2 ш.м.

№90 УПП – Сарыарқа ауданында, Сұлтан Бейбарыс көшесі, 12-үйде, «Мирный дом» ТҮК-де орналасқан. 31 мыңнан астам тұрғынға арналған. Аумағы – 118 ш.м.

№7 УПП – Алматы ауданында, Мұқан Төлебаев көшесі, 5-үйде, «Арыстан» ТҮК-де ашылды. 41 мыңнан аса адамды қамтиды. Аумағы – 197 ш.м. Мұнда отбасылық-тұрмыстық зорлық және кәмелетке толмағандар істері жөніндегі инспекторларға жеке кабинеттер және конференц-зал қарастырылған.

Барлық пункттер заманауи техникамен, бейнебақылау жүйесімен, компьютерлермен, азаматтарды қабылдауға арналған қолайлы кабинеттермен жабдықталған. Енді тұрғындар учаскелік инспекторға өз шағынауданынан шықпай-ақ тікелей жүгіне алады.

Полиция мен халық арасындағы өзара сенімді арттыру, құқықбұзушылықтың алдын алу және жедел әрекет ету – жаңадан ашылған пункттердің негізгі мақсаты.

Ашылу рәсіміне Астана қалалық полиция департаментінің бастығы Марат Төлебаев, Мәжіліс депутаты Наталья Дементьева, мәслихат депутаты Бауыржан Смаилов және аудан әкімдері қатысты.

Жаңа пункттердің ашылуы – полицияның сервистік моделіне көшу жолындағы нақты қадам. Біз тұрғындардың қауіпсіздігін қамтамасыз ету және полициямен ашық байланысын күшейту арқылы «Заң мен Тәртіп» қағидатын жүзеге асырып келеміз, – деді полиция департаментінің бастығы Марат Төлебаев.